Frika nga një konflikt i mundshëm midis vendeve të Ballkanit Perëndimor ka pësuar rënie gjatë vitit 2025. Sipas një ankete të Këshillit të Bashkëpunimit Rajonal (RCC), e cila mat perceptimin e qytetarëve mbi sigurinë në rajon, ky vit shënon një kthesë pozitive krahasuar me 2024: afro gjysma e të anketuarve shprehën shqetësim të ulët për një konflikt të mundshëm midis vendeve të tyre.
Në Shqipëri, perceptimi publik ka ndryshuar dukshëm. Në vitin e kaluar, 53.6% e qytetarëve shprehën frikë të lartë nga një përplasje rajonale, ndërsa në 2025 kjo përqindje ra në 44.5%. Ndërkohë, ata që ndihen pak të shqetësuar u rritën nga 43.1% në 50%, duke treguar rritje të ndjenjës së sigurisë.
Bosnja dhe Hercegovina vijon të mbajë nivelin më të lartë të frikës ndaj një konflikti të mundshëm midis gjashtë vendeve të rajonit. Si në 2024 ashtu edhe në 2025, shumica e qytetarëve atje vazhdojnë të shprehin shqetësim të madh.
Kosova paraqet situatën më optimiste. Në të dy vitet, 2024 dhe 2025, një shumicë e madhe e popullsisë – 69.5% dhe 72.5% – kanë deklaruar shqetësim të ulët. Vetëm rreth 24% shprehen shumë të frikësuar, çka tregon një ndjenjë të fortë dhe në rritje të sigurisë për stabilitetin rajonal.
Në Serbi, perceptimi mbetet relativisht i pandryshuar dhe më pesimist. Rreth 53.8% e qytetarëve në 2024 dhe 2025 shprehen shumë të shqetësuar për mundësinë e një konflikti në Ballkanin Perëndimor.
Ndërkohë, Mali i Zi dhe Maqedonia e Veriut paraqesin një situatë më të balancuar, pa lëvizje të mëdha në nivelin e shqetësimeve të qytetarëve. /Skyweb.al
