Jemi në atmosferën e festave, ku shumica planifikon të udhëtojë. Po në të njëjtën kohë gripi në këtë periudhë është duke u përhapur me shpejtësi në botë.
Gjatë takimeve festive, dikush mund të jetë duke u shëruar ose sapo të ketë filluar simptomat. Ekspertët këshillojnë që të testoheni sapo të shfaqen simptomat, veçanërisht nëse i përkisni grupeve me rrezik të lartë: persona mbi 65 vjeç, me sëmundje kronike, sistem imunitar të dobët, gra shtatzëna dhe fëmijë të vegjël, shkruan CNN.
Simptomat e gripit zakonisht fillojnë papritur dhe përfshijnë ethe, të dridhura, dhimbje koke, dhimbje trupi dhe lodhje. Nëse testi del pozitiv, është e rëndësishme të shmangni kontaktin me të tjerët dhe të filloni trajtimin sa më shpejt. Medikamentet antivirale funksionojnë më mirë brenda 48 orëve nga fillimi i simptomave.
Nëse testi i shpejtë del negativ, por simptomat janë të forta, rekomandohet të bëni një test më të saktë te mjeku. Gripi nuk është e vetmja sëmundje, mund të jetë edhe Covid-19, i cili ka trajtim specifik.
Sipas mjekëve, një person me grip duhet të qëndrojë në shtëpi derisa të mos ketë ethe për të paktën 24 orë pa përdorur ilaçe, dhe simptomat të jenë duke u përmirësuar. Kjo zakonisht zgjat 4–5 ditë. Edhe mbajtja e maskës nuk është e mjaftueshme për të marrë pjesë në takime familjare, pasi rreziku i përhapjes mbetet i lartë.
Qëllimi kryesor gjatë festave është të mbrojmë veten dhe të tjerët, ndonjëherë, dhurata më e mirë është të qëndrojmë në shtëpi derisa të shërohemi. /skyweb.al
