Nëse po mendoni të planifikoni një udhëtim në Evropë gjatë vitit 2026, Shqipëria renditet ndër zgjedhjet më të mira, shkruan John Walsh për faqen e njohur australiane të udhëtimeve travel.nine.com.au.
“Sipas zakonit, për ata që vizitojnë Evropën për herë të parë, dëshira është të shohin ikona si Kulla Eiffel apo Koloseu. Megjithatë, këshilla jonë është të eksploroni destinacione më pak të njohura – dhe Shqipëria është një prej tyre,” thekson artikulli.
Vendi mbetet ende relativisht i pazbuluar nga shumica e turistëve ndërkombëtarë. Një sondazh i vitit 2024 tregoi se Shqipëria regjistroi rritjen e tretë më të madhe të turizmit në nivel global dhe rritjen më të lartë mes vendeve evropiane.
Në këtë rritje ka ndikuar edhe fama ndërkombëtare e yllit të muzikës pop, Dua Lipa, e cila ka origjinë shqiptare dhe mori nënshtetësinë shqiptare në vitin 2022, si vlerësim për promovimin e Shqipërisë përmes muzikës dhe rrjeteve sociale.
Shqipëria po ndërton një reputacion gjithnjë e më të fortë për plazhet e saj të pastra dhe bukurinë natyrore, shpesh të krahasuara me ato të Greqisë dhe Italisë. Qytetet historike të Beratit dhe Gjirokastrës janë pjesë e Trashëgimisë Botërore të UNESCO-s, ndërsa Parku Kombëtar i Thethit ofron mundësi ecjeje dhe eksplorimi në natyrë të nivelit botëror.
Një tjetër avantazh i madh mbeten çmimet e përballueshme për akomodim dhe ushqim, të cilat e bëjnë Shqipërinë një destinacion tepër tërheqës për udhëtarët. /skyweb.al
