Qeveria italiane ka dhënë miratimin përfundimtar për ndërtimin e një ure gjigante mbi ngushticën e Mesinës, që do të lidhë Sicilinë me Italinë kontinentale.
Me një gjatësi rreth 3.7 kilometra dhe një hapësirë të vetme, ajo pritet të jetë ura më e gjatë në botë e këtij lloji, duke zëvendësuar kalimin aktual me traget dhe duke përmirësuar ndjeshëm lidhjet rrugore e hekurudhore.
Projekti, i konceptuar që në fund të viteve 1960 por i shtyrë për dekada për arsye mjedisore, financiare dhe teknike, ka marrë miratimin e Komitetit Ndërministror për Planifikim Ekonomik dhe Zhvillim të Qëndrueshëm (CIPESS).
Kryeministrja Giorgia Meloni e ka cilësuar ndërtimin si një projekt prioritar dhe ka planifikuar një financim prej 13.5 miliardë eurosh në dhjetë vitet e ardhshme për urën dhe infrastrukturën mbështetëse.
Zbatimi i projektit i është besuar konsorciumit ndërkombëtar “Eurolink”, i udhëhequr nga kompania italiane “Webuild”, në bashkëpunim me “Sacyr” të Spanjës dhe “IHI” të Japonisë.
Këto kompani kanë eksperiencë në ndërtimin e veprave madhore si ura “Osman Gazi” në Turqi, ura Akashi në Japoni dhe zgjerimi i Kanalit të Panamasë.
Sipas kompanisë mbikëqyrëse “Messina Strait”, punimet do të përfundojnë në vitin 2032 dhe do të krijojnë mbi 100 mijë vende pune. Faza e parë do të përfshijë studime arkeologjike, gjeologjike dhe procedurat e shpronësimeve.
Megjithëse konsiderohet një projekt historik, ura ka ngjallur reagime të forta nga aktivistët mjedisorë, banorët lokalë dhe organizatat joqeveritare.
Ata shprehin shqetësime për rrezikun sizmik të zonës, ndikimin mjedisor, koston e lartë që mund të tejkalojë parashikimet, si dhe për mundësinë e përfshirjes së mafies në tendera dhe proceset e ndërtimit.
Këtë javë, disa organizata mjedisore dorëzuan një ankesë zyrtare në Bashkimin Evropian, duke kërkuar ndërhyrje për mbrojtjen e biodiversitetit të ngushticës.
Vendimi i CIPESS duhet ende të ratifikohet nga Gjykata Kombëtare e Auditit, një hap procedural që pritet të zgjasë disa javë, përpara nisjes zyrtare të punimeve. /skyweb.al
