Banka e Shqipërisë ka dhënë miratimin paraprak për licencimin e degës së parë të Ziraat Bank në vendin tonë. Brenda një afati 12-mujor nga data e vendimit, banka turke duhet të përmbushë të gjitha kushtet e përcaktuara në ligjin “Për bankat në Republikën e Shqipërisë” dhe aktet nënligjore përkatëse, në mënyrë që të pajiset me licencën për të nisur aktivitetin.
Ziraat Bank është një institucion bankar shtetëror në Turqi, i themeluar në vitin 1863, me licencë të vlefshme bankare dhe leje operimi nën mbikëqyrjen e Agjencisë së Rregullimit dhe Mbikëqyrjes Bankare të Turqisë.
Ajo operon në 19 shtete të botës, përfshirë 5 vende të Ballkanit Perëndimor, si dhe në Mbretërinë e Bashkuar, Bullgari, Greqi, Kosovë dhe Qipro Veriore.
Kjo do të jetë banka e dytë me kapital turk në Shqipëri, pas Bankës Kombëtare Tregtare. Ziraat ka profil të theksuar në kreditimin e bizneseve që operojnë në sektorin e bujqësisë.
Aktualisht në Shqipëri operojnë 11 banka, shumica me kapital të huaj. Gjatë 19 viteve të fundit nuk është licencuar asnjë bankë e re. Në vitet e fundit nga tregu shqiptar janë larguar Veneto Bank, Société Générale, NBG Bank dhe së fundmi Alpha Bank, ndërsa austriakët e Raiffeisen Bank po ndjekin një strategji të tërheqjes graduale nga rajoni, përfshi Shqipërinë. /skyweb.al
