OpenAI po përballet me kritika të forta pas zbulimit se biseda private të përdoruesve në ChatGPT, disa prej të cilave përmbanin informacione tepër të ndjeshme, janë indeksuar dhe janë shfaqur në rezultatet e kërkimit të Google.
Rasti u publikua fillimisht nga Fast Company, dhe lidhet me një funksion që u lejonte përdoruesve të ndanin bisedat e tyre përmes një linku me opsionin që ato të bëheshin “të zbulueshme” (“discoverable”) në Google.
Shumë përdorues nuk ishin të vetëdijshëm se aktivizimi i këtij opsioni do ta bënte publikisht të aksesueshme përmbajtjen e bisedës, duke e bërë atë të shfaqej në motorët e kërkimit.
Edhe pse emrat e përdoruesve nuk ishin të lidhur direkt me bisedat, shumë prej tyre kishin ndarë informacione personale si probleme të shëndetit mendor, përvoja seksuale apo konflikte me të tjerë, të dhëna që mund të çojnë në identifikimin e personave.
Pas zbulimit të problemit, OpenAI ka hequr këtë funksion dhe po punon për të hequr nga indeksimi i Google dhe motorëve të tjerë të kërkimit bisedat e ekspozuara.
Megjithatë, ekspertët paralajmërojnë se shumë prej tyre mund të jenë arkivuar tashmë nga motorë të tjerë kërkimi.
Kompania e pranoi se vendimi për të lejuar këtë opsion ishte i gabuar dhe se mënyra e implementimit ishte keqinformuese për përdoruesit.
Ky incident ka rindezur debatet për privatësinë e të dhënave në platformat e inteligjencës artificiale, me ekspertë që paralajmërojnë se përdoruesit shpesh përdoren si “objekte prove” për funksione eksperimentale. /skyweb.al
