Sektori i ndërtimit po shfaq sinjale të forta rikuperimi dhe besimi, duke u dalluar nga sektorët e tjerë të ekonomisë. Të dhënat e fundit nga vrojtimi i besimit të biznesit dhe konsumatorit i Bankës së Shqipërisë tregojnë se, ndonëse treguesi i ndjesisë ekonomike ka pësuar një rënie të lehtë në muajin dhjetor, ndërtimi ka ndjekur një prirje të kundërt dhe dukshëm pozitive.
Treguesi i ndjesisë ekonomike ra me 0.4 pikë në dhjetor, kryesisht si pasojë e dobësimit të besimit në sektorët e shërbimeve dhe industrisë. Pavarësisht kësaj rënieje mujore, niveli i përgjithshëm i treguesit mbetet rreth 6 pikë përqindje mbi mesataren historike, duke sinjalizuar një klimë ekonomike ende relativisht të qëndrueshme.
Në këtë kontekst, sektori i ndërtimit spikat për një kthesë të fortë pozitive.
Treguesi i besimit në ndërtim u rrit me 4.5 pikë përqindje në dhjetor, duke u pozicionuar 16.6 pikë përqindje mbi mesataren afatgjatë.
Ky zhvillim vjen pas një rënieje të ndjeshme të këtij treguesi në muajin nëntor, kur besimi në ndërtim ishte ulur me 3.1 për qind, duke reflektuar pasiguri të përkohshme në aktivitetin e sektorit.
Rikthimi i fortë në dhjetor lidhet me përmirësimin e vlerësimeve të bizneseve si për aktivitetin aktual ndërtues, ashtu edhe për porositë në vijim. Burime nga tregu e lidhin këtë rritje edhe me rikthimin sezonal të emigrantëve në fundvit, i cili ka sjellë një injektim më të madh parash në sektorin e ndërtimit, veçanërisht për blerje banesash, investime dhe financim projektesh.
Të dhënat tremujore për tremujorin e katërt përforcojnë këtë tablo pozitive. Gjendja financiare e bizneseve në ndërtim është përmirësuar, ndërsa norma e shfrytëzimit të kapaciteteve mbetet në nivele të qëndrueshme, pavarësisht luhatjeve mujore. Paralelisht, pritjet për çmimet në të ardhmen janë rishikuar për lart, duke reflektuar kërkesë të fortë dhe presion në rritje nga kostot.
Ndërkohë që sektorë si industria dhe shërbimet shfaqin sinjale më të kujdesshme, ndërtimi po konsolidohet si një nga shtyllat kryesore të besimit ekonomik dhe të investimeve në vend. Rikthimi i fortë i besimit në dhjetor sugjeron se ky sektor mbetet një motor i rëndësishëm i aktivitetit ekonomik, i mbështetur nga flukset financiare, kërkesa e qëndrueshme dhe faktorë sezonalë që ndikojnë drejtpërdrejt në ecurinë e tij. /skyweb.al
