Çmimet e arit dhe argjendit janë rritur ndjeshëm, teksa investitorët janë orientuar drejt aktiveve të sigurta për shkak të rritjes së pasigurisë gjeopolitike pas arrestimit të udhëheqësit venezuelian Nicolas Maduro nga Shtetet e Bashkuara.
Sipas mediave ndërkombëtare, çmimi i arit u rrit deri në 2.1 për qind gjatë ditës së hënë, duke kaluar nivelin e 4,420 dollarëve për ons, ndërsa argjendi shënoi një rritje edhe më të fortë, afër 5 për qind.
Presidenti i SHBA-së, Donald Trump, deklaroi se Uashingtoni synon të marrë një rol drejtues në Venezuelë pas rrëzimit të Maduros gjatë fundjavës, duke e lënë të paqartë të ardhmen politike të vendit të Amerikës së Jugut. Trump theksoi se SHBA-të kanë nevojë për qasje të plotë në Venezuelë, përfshirë edhe rezervat e saj të naftës.
Sipas Christopher Wong, analist në Oversea-Chinese Banking në Singapor, këto zhvillime kanë rritur ndjeshëm klimën e pasigurisë gjeopolitike, duke shtyrë investitorët drejt metaleve të çmuara. Megjithatë, ai vlerëson se rreziqet afatshkurtra mbeten të kufizuara, pasi situata në Venezuelë po evoluon drejt një mbylljeje relativisht të shpejtë, dhe jo drejt një konflikti ushtarak të zgjatur.
Ari sapo ka mbyllur performancën e tij më të mirë vjetore që nga viti 1979, duke vendosur disa rekorde historike gjatë vitit të kaluar. Rritja është mbështetur nga blerjet e vazhdueshme të bankave qendrore dhe nga flukset në rritje në ETF-të e lidhura me metalet e çmuara.
Një tjetër faktor mbështetës ka qenë politika monetare e Rezerva Federale, e cila ka ndërmarrë tre ulje radhazi të normave të interesit. Ky zhvillim favorizon metalet e çmuara, pasi ato nuk gjenerojnë interes dhe bëhen më tërheqëse në një mjedis normash të ulëta./skyweb
