Ish-kryeministri Sali Berisha u paraqit këtë të hënë në Prokurorinë e Posaçme, në zbatim të masës së sigurisë për çështjen e njohur si dosja “Partizani”. Ashtu si herët e tjera, ai dha një deklaratë për mediat, ku njoftoi se SPAK, sipas tij, i ka shtuar një akuzë të re që lidhet me investimet e fëmijëve të tij në pasuri të paluajtshme.
Berisha sqaroi se bëhet fjalë për një apartament tip 3+1 të privatizuar në fillim të viteve ’90, ku pjesë e pronësisë kanë qenë edhe fëmijët e tij, për shkak se në atë kohë kishin mbushur moshën 18 vjeç. Ai theksoi se përfitimi është bërë në përputhje të plotë me ligjin e privatizimit të banesave, një proces nga i cili, sipas tij, kanë përfituar rreth një milion qytetarë shqiptarë.
Duke iu referuar deklarimeve të dorëzuara ndër vite në ILDKPKI, Berisha tha se vajza e tij ka deklaruar që në vitin 1993 një apartament banimi me sipërfaqe 77 metra katrorë, të përfituar nga privatizimi, ku zotëronte një të tretën e pronësisë. Po ashtu, ai sqaroi se edhe apartamenti tjetër familjar është privatizuar sipas ligjit dhe se e drejta reale e pronësisë është ndarë mes bashkëjetuesve, përfshirë bashkëshorten dhe fëmijët.
Ish-kryeministri kundërshtoi interpretimin e Prokurorisë së Posaçme, e cila sipas tij e paraqet këtë fakt si element rëndues, duke e lidhur me kohën kur ai ushtronte funksione të larta shtetërore. Berisha argumentoi se investimet dhe përfitimet nga privatizimi nuk kanë lidhje me çështjen “Partizani” dhe nuk përbëjnë vepër penale.
Ai e cilësoi akuzën e re si të pabazuar dhe alogjike, duke deklaruar se po përdoret për ta rënduar artificialisht dosjen. Sipas tij, përfshirja e pronësive të privatizuara ligjërisht në këtë proces përbën një përpjekje për kriminalizim politik dhe jo një hetim të mbështetur në fakte konkrete.
Berisha u shpreh se do ta vazhdojë betejën ligjore për të provuar pafajësinë e tij, ndërsa përsëriti akuzat ndaj SPAK, të cilin e konsideron të motivuar politikisht. /skyweb.al
