Serbia po konsolidon pozitat si një qendër e re për industrinë ushtarake në rajon, pas planit për prodhimin e dronëve në bashkëpunim me Elbit Systems.
Projekti parashikon ndërtimin e një fabrike në territorin serb, duke e zhvendosur fokusin e zhvillimeve konkrete drejt një vendi që tashmë ka bazë industriale dhe eksperiencë në sektorin e mbrojtjes.
Ky zhvillim ngre pikëpyetje të drejtpërdrejta për Shqipërinë, e cila në verën e vitit 2025 firmosi një marrëveshje të ngjashme me Elbit Systems për bashkëpunim në fushën e teknologjisë ushtarake dhe dronëve. Deri më tani, nuk ka asnjë zhvillim konkret në terren që të tregojë se ky bashkëpunim po materializohet.
Në kontrast me Serbinë, Shqipëria nuk disponon një infrastrukturë të zhvilluar ushtarake-industriale dhe as kapacitetet teknike apo njerëzore për të mbështetur prodhim të avancuar të kësaj natyre.
Mungesa e “know-how”-t dhe e një ekosistemi të lidhur me industrinë e mbrojtjes e bën të vështirë që projekte të tilla të kalojnë nga marrëveshje politike në investime reale.
Ndërkohë, Serbia përfiton nga një traditë e trashëguar në industrinë ushtarake, struktura shtetërore funksionale në këtë sektor dhe partneritete të mëparshme me kompani ndërkombëtare. Kjo e bën atë një destinacion më tërheqës për investime strategjike si ai i Elbit./skyweb.al
