Tensionet dhe sulmet nga Irani ndaj Emiratet e Bashkuara Arabe kanë tronditur perceptimin e sigurisë, duke shtyrë një pjesë të elitës financiare të kërkojë alternativa në Europë. Në krye të listës po ngjitet Milano, që po shihet gjithnjë e më shumë si një zëvendësim i qëndrueshëm për Dubain.
Italia po tërheq interes falë një skeme fiskale konkurruese, që u lejon rezidentëve të huaj të paguajnë një taksë fikse prej 300 mijë eurosh në vit për të ardhurat e realizuara jashtë vendit. Për individët me pasuri shumë të lartë, kjo konsiderohet një kosto e ulët krahasuar me përfitimet që ofron vendi.
Qytete si Milano dhe Roma po përfitojnë drejtpërdrejt nga kjo prirje, duke u kthyer në qendra të reja për investitorët dhe profesionistët e pasur. Karakteri ndërkombëtar, infrastruktura urbane dhe cilësia e jetesës po i bëjnë këto qytete gjithnjë e më tërheqëse për zhvendosje afatgjatë.
Rritja e interesit po reflektohet edhe në tregun e pasurive të paluajtshme. Në Milano, çmimet janë rritur ndjeshëm gjatë viteve të fundit, duke e kthyer qytetin në më të shtrenjtin në Itali. Zonat pranë qendrës historike dhe Duomos janë ndër më të kërkuarat nga blerësit ndërkombëtarë.
Kjo lëvizje lidhet edhe me ndryshimet fiskale në vende të tjera, përfshirë Mbretëria e Bashkuar, ku heqja e statusit “non-dom” ka ulur ndjeshëm tërheqjen për të pasurit. Në Milano, kjo valë është quajtur edhe “zbraz Londrën”, duke reflektuar zhvendosjen e kapitalit dhe individëve drejt Italisë.
Paralelisht, qytetet italiane po transformohen. Galeri arti, hotele luksoze dhe klube private po shtohen, ndërsa zona si Via Monte Napoleone janë kthyer në pika referimi globale për blerjet luksoze.
Megjithatë, mbetet e paqartë nëse Milano do të arrijë të zëvendësojë plotësisht Dubain. Pavarësisht goditjes së fundit, Dubai vazhdon të ofrojë një kombinim unik të taksave të ulëta dhe mundësive financiare, që pritet ta mbajnë në hartën globale të elitës.
Në këtë fazë, duket se gara për tërheqjen e super të pasurve po zhvendoset drejt Europës, me Italinë që po pozicionohet si përfituesja kryesore e kësaj lëvizjeje.
