Ministria e Infrastrukturës dhe Energjisë ka publikuar një raport të detajuar mbi situatën në vend si pasojë e motit të keq, ndërsa grupet e punës vijojnë të jenë në terren për menaxhimin e problematikave të krijuara nga reshjet e shiut dhe dëborës.
Sipas njoftimit zyrtar, gjatë mbrëmjes së djeshme dhe orëve të para të ditës së sotme, përveç reshjeve intensive të shiut, në një numër të madh zonash janë regjistruar edhe reshje dëbore. Ekipet e Autoritetit Rrugor Shqiptar, OSHEE dhe strukturat e tjera nën varësinë e Ministrisë së Infrastrukturës dhe Energjisë kanë qenë në veprim të pandërprerë, pavarësisht temperaturave të ulëta dhe kushteve të vështira atmosferike.
Në akset rrugore të veriut, qendrës dhe jugut të vendit janë shënuar reshje dëbore në zona malore dhe akse lidhëse, por autoritetet bëjnë me dije se të gjitha rrugët mbeten të hapura dhe qarkullimi po zhvillohet normalisht. Drejtuesit e mjeteve këshillohen të përdorin goma dimërore dhe zinxhirë në zonat me dëborë, për të shmangur bllokimet dhe incidentet në trafik.
Sa i përket furnizimit me energji elektrike, aktualisht raportohen disa fidera jashtë funksionit, kryesisht në rajonin e Durrësit, për shkak të prezencës së ujit në kabina. Ndërkohë, po punohet për riparimin e një defekti në rrjetin që furnizon Hidrovorin e Synejt, ndërsa linjat kryesore dhe nënstacionet janë në funksion normal. Rrjeti i transmetimit vijon operimin pa probleme, me të gjitha brigadat në gatishmëri.
Në Kaskadën e Drinit, prurjet natyrore mbeten të larta, me sasi të konsiderueshme uji që vijnë drejt hidrocentraleve, ndërsa situata po monitorohet në mënyrë të vazhdueshme nga strukturat përgjegjëse.
Problematika janë evidentuar edhe në furnizimin me ujë në disa zona. Në qarkun e Beratit janë hasur vështirësi për shkak të reshjeve të pandërprera, por furnizimi aktualisht vijon normalisht. Në Fier po punohet për forcimin e argjinaturës në stacionin kryesor të pompimit, ndërsa në Vlorë janë përmbytur dy nënstacione në Novoselë dhe Trevllazër. Në rajonet e tjera të vendit, situata paraqitet e qëndrueshme dhe pa ndërprerje në shërbimet bazë.
Sa i përket porteve dhe aeroportit, aktiviteti në Portin e Durrësit dhe Portin e Vlorës vijon normalisht, me kufizime vetëm për mjetet e vogla detare. Në Portin e Sarandës është pezulluar përkohësisht linja me Korfuzin për shkak të detit të trazuar. Operimet në Aeroportin “Nënë Tereza” po zhvillohen pa probleme.
Autoritetet bëjnë të ditur se situata po ndiqet në kohë reale dhe ndërhyrjet do të vijojnë kudo ku do të shfaqen problematika të reja nga kushtet e motit.
