Personat që ndërpresin përdorimin e injeksioneve për humbje peshe, si Mounjaro dhe Ëegovy, mund ta rifitojnë peshën e humbur deri në katër herë më shpejt krahasuar me ata që ndalojnë dietën dhe aktivitetin fizik tradicional, sugjeron një studim i ri.
Të dhënat e publikuara në British Medical Journal (BMJ) tregojnë se personat mbipeshë që përdorin këto injeksione mund të humbasin rreth 20% të peshës trupore gjatë trajtimit.
Megjithatë, sapo trajtimi ndërpritet, pesha fillon të rikthehet me shpejtësi. Sipas studimit, ish-përdoruesit e injeksioneve shtojnë mesatarisht 0.8 kilogramë në muaj, çka do të thotë se ata mund të kthehen në peshën fillestare brenda rreth një viti e gjysmë.
Ndërkohë, personat që humbin peshë përmes dietës dhe ushtrimeve fizike zakonisht shtojnë peshë më ngadalë pas ndërprerjes, rreth 0.1 kilogram në muaj, edhe pse kjo ndryshon nga individi në individ.
Dr Susan Jebb, profesoreshë në Universitetin e Oksfordit dhe studiuese e injeksioneve për dobësim, theksoi se këto rezultate bazohen në prova klinike mjekësore dhe jo domosdoshmërisht në kushtet e jetës reale.
Ajo nënvizoi se nevojiten më shumë studime afatgjata për të kuptuar më mirë efektet e këtyre barnave pas ndërprerjes dhe ndikimin e tyre në ruajtjen e peshës në kohë.
Ekspertët shpjegojnë se këto injeksione veprojnë duke imituar hormonin GLP-1, i cili rregullon ndjenjën e urisë. Kur përdorimi i tyre ndalet, oreksi mund të rikthehet fuqishëm, duke rritur rrezikun e mbingrënies dhe shtimit të shpejtë në peshë.
Shërbimet shëndetësore rekomandojnë që injeksionet për dobësim të përdoren kryesisht për persona me obezitet dhe probleme shëndetësore të lidhura me peshën, dhe gjithmonë të shoqërohen me ndryshime në stilin e jetesës, si ushqyerja e shëndetshme dhe aktiviteti fizik.
Studiuesit paralajmërojnë se obeziteti është një gjendje kronike, dhe për shumë njerëz, trajtimi afatgjatë mund të jetë i nevojshëm për të shmangur rikthimin e peshës. /skyweb.al
