Instagram ka njoftuar se do të informojë prindërit që kanë aktivizuar mbikëqyrjen e llogarive të fëmijëve të tyre në rast se këta të fundit kërkojnë përmbajtje që lidhet me vetëvrasjen apo vetëplagosjen. Lajmi u bë i ditur përmes një deklarate zyrtare të rrjetit social.
Njoftimet do t’u dërgohen prindërve përmes email-it, SMS-së ose WhatsApp-it, në varësi të të dhënave të kontaktit të dhëna gjatë regjistrimit, si edhe përmes një njoftimi brenda aplikacionit.
Pas marrjes së njoftimit, prindërve do t’u ofrohen numra emergjence dhe këshilla të hartuara në bashkëpunim me profesionistë të shëndetit mendor, për t’i ndihmuar ata të flasin me fëmijët mbi këtë temë të ndjeshme.
Sistemi i ri i njoftimeve do të nisë zbatimin javën e ardhshme në Shtetet e Bashkuara, Mbretërinë e Bashkuar, Australi dhe Kanada, ndërsa më vonë gjatë vitit do të shtrihet edhe në vende të tjera.
Platforma thekson se ka vendosur një prag për numrin e kërkimeve brenda një periudhe të shkurtër kohore që do të aktivizojnë njoftimin, por lë të hapur mundësinë e rregullimit të tij në bazë të reagimeve të përdoruesve.
“Sipas rastit, mund të ndodhë që prindërit të njoftohen edhe kur nuk ka arsye reale për shqetësim,” thuhet në reagimin e kompanisë mëmë Meta, “por ne besojmë, dhe ekspertët pajtohen, se kjo është një pikënisje e mirë”.
Kjo nismë është pjesë e përpjekjeve të vazhdueshme për të forcuar mbrojtjen e përdoruesve të mitur në platformë. /Skyweb.al
