Shqipëria do të ketë një hartë të re vreshtarie për kultivimin e rrushit për verë. Projektligji i ri i hedhur për konsultim publik synon të fuqizojë varietetet vendase të verës si dhe t’i përshtatet standardeve që kërkon tregu i Bashkimit Europian, përmes certifikimit të produkteve. Por cilat do të jenë efektet e homogjenizimit të zonave për prodhim vere?
Enver Shehi, Agronom Vreshtarie, Prodhues Vere:
“Ky projektligj ka goxha avantazhe. Së pari nxjerr në pah varietetet autoktone të përshtatshme që i përkasin një zone gjeografike në të cilën bëhen më të besueshme apo më të vlerësueshme. Për shembull, Sheshi Bardhë apo Sheshi i zi, mbillet në Shqipërinë e mesme, Por kjo nuk do të thotë që të penalizohen një shtrirje më të gjerë gjeografike, kur plotësohen këto kritere, të mos mbillet Sheshi në zona të tjera. Ky është një lloj disavantazhi. Nga ana tjetër nuk mund të mos e favorizojmë një prodhues fermer kur ai prodhon me cilësi, që të mos bashkëpunojë me ne, pavarësisht nëse eshtë në zonën e miratuar apo jo, ndërsa në projektligj kërkohet që ti duhet ta deklarosh ku e merr lëndën e parë.”
Uka, Enolog, Prodhues vere:
“Ndarja zonale duhet për identifikimin dhe prejardhjen e origjinës, sepse prejardhja e origjinës, i jep më garanci konsumatorit, që do të thotë, kur është një verë e hapur në një karton ti nuk e di çfarë ka në atë dhe nga ka ardhur sepse nuk ka një ligj dhe nuk ka një vulë. Për shembull po të marrim rastin e Italisë, ata kanë tre vula, DOCG, DOC, dhe IGT. Këto vula tregojnë besueshmëri dhe gjurmueshmëri. Në Shqipëri është shumë më e lehtë për tu bërë sepse Shqipëria është shumë e vogël. Ka shumë më pak kantina.”
Objektivat që priten të arrihen janë klasifikimi zyrtar i zonave të prodhimit të rrushit për verë; Krijimi i një baze shkencore për zonimin; Krijimi i zonave homogjene të përshtatshme për kultivimin e varieteteve autoktone si: Kallmet, Sheshi i Zi, Sheshi i Bardhë, Vlosh, Serina dhe Debina.
Ky proces konsiderohet si i domosdoshëm për përfshirjen e verërave shqiptare në skemën e cilësisë së Bashkimit Evropian (Treguesit Gjeografikë të Mbrojtur-TGJM, Emërtimet e Origjinës së Mbrojtur-EOM, termat tradicionalë etj.) të cilat sot dominojnë tregun e verërave evropiane. /tvscan
