Prej dy ditësh, një video po qarkullon gjerësisht në media online dhe në rrjete sociale, e shoqëruar me tituj që lënë të kuptohet se përpunuesi i qumështit Lufra po hedh në treg produkte të kontaminuara me aflatoksinë.
Ky interpretim është i gabuar dhe dezinformues.
Në disa raste për shkak keqdashjeje, e në të tjera për shkak të moskuptimit të plotë të përmbajtjes së videos dhe mesazhit shoqërues, një pjesë e mediave e kanë shpërndarë lajmin me tituj dhe përmbajtje të pasaktë.
Nga verifikimi i përmbajtjes rezulton se situata është krejt e kundërta nga ajo që është raportuar në shumë media online dhe faqe në rrjetet sociale.
Siç konstatohet edhe nga SMS-ja e fermerit, shpërndarë nga deputeti Erion Braçe, përpunuesi i qumështit refuzon grumbullimin e qumështit që rezulton me aflatoksinë, pas analizave të kryera në momentin e dorëzimit, dhe nuk e fut atë në zinxhirin e prodhimit.
Kjo del qartë edhe nga komunikimi i fermerit i shfaqur në video, ku theksohet se ndotja konstatohet gjatë dorëzimit dhe produkti nuk pranohet nga përpunuesi.
Ky është një lajm pozitiv për konsumatorët dhe një praktikë që duhet vlerësuar, jo sulmuar.
Është e vërtetë që fermerët shqiptarë po përballen me vështirësi serioze në prodhimin dhe shitjen e qumështit, për shkak të politikave fiskale, mungesës së mbështetjes, konkurrencës nga qumështi i importit me çmime më të ulëta, por edhe sjelljes dëmtuese nga grumbullues të ndryshëm.
Megjithatë, zgjidhja e këtyre problemeve nuk është përgjegjësi e konsumatorëve apo e përpunuesve, por e institucioneve shtetërore.
Në këtë sektor, dështimi i shtetit ka qenë i dukshëm, veçanërisht përmes keqmenaxhimit dhe abuzimit me fondet IPARD, në dëm të fermerëve të ndershëm, të cilët sot rropaten pa mbështetje dhe shpesh edhe pa njohuritë e nevojshme për të prodhuar qumësht pa aflatoksinë.
Detyra e shtetit është të edukojë fermerët, t’u krijojë kushtet e duhura të prodhimit dhe të garantojë sigurinë ushqimore.
Po aq detyrë e përpunuesve është të furnizojnë tregun vetëm me produkte cilësore dhe të sigurta.
Në rastin konkret duket se përpunuesi po e bën detyrën e tij, kurse shteti jo.
Skyweb.al ka qenë dhe është mjaft kritik, deri në bezdi në lidhje me përpunuesit e qumështit në vend, por siç kritika ngjit vetëm duke u treguar të ndershëm me lexuesit.
Po ashtu, ne kemi raportuar vazhdimisht për sfidat e mëdha të fermave shqiptare, të cilat nga viti në vit po reduktojnë numrin e gjësë së gjallë, si pasojë e politikave të gabuara të ndjekura në bujqësi dhe blegtori.
Në këtë kontekst, rasti në fjalë përfaqëson një praktikë pozitive nga ana e përpunuesit, i cili vepron për të mbrojtur fillimisht biznesin e tij dhe njëkohësisht shëndetin e konsumatorëve.
Çështja thelbësore mbetet pse një pjesë e qumështit të prodhuar nga fermerët rezulton me aflatoksinë, pse nuk edukohet fermeri të prodhojë qumësht pa aflatoksinë dhe çfarë ndikimi kanë politikat bujqësore dhe keqmenaxhimi i fondeve publike në shkatërrimin e fermave vendase. /skyweb.al
