Administrata Tatimore ka paralajmëruar një valë kontrollesh të thelluara ndaj kompanive të ndërtimit, duke bërë të qartë se verifikimet nuk do të kufizohen vetëm te pagat dhe sigurimet shoqërore, por do të shtrihen edhe te origjina e parave dhe transaksionet financiare.
Përmes një komunikimi zyrtar drejtuar subjekteve të identifikuara me risk të lartë, Tatimet njoftojnë se ndërtuesit që nëndeklarojnë pagat ose fshehin punonjës do t’i nënshtrohen hetimeve të zgjeruara, në bashkëpunim edhe me agjenci të tjera ligjzbatuese.
Masat po ndërmerren në kuadër të Planit Sektorial për Ndërtimin, i cili synon formalizimin e sektorit dhe rritjen e kontributeve të sigurimeve shoqërore. Sipas Administratës Tatimore, kontrollet në terren kanë nisur që prej datës 16 janar.
Tatimet bëjnë me dije se disponojnë një bazë të gjerë të dhënash për subjektet e ndërtimit, të siguruara nga Agjencia e Pronësisë, pushteti vendor, agjencitë imobiliare, deklaratat tatimore, listëpagesat mujore, faturat e fiskalizuara, si dhe nga të dhënat e furnitorëve për mallra dhe shërbime.
Në njoftimin drejtuar bizneseve, administrata kërkon deklarimin e plotë të punonjësve, deklarimin real të pagave sipas profesionit dhe tregut të punës, fiskalizimin e çdo shitjeje apo parapagimi, blerjen e mallrave dhe shërbimeve vetëm me faturë të rregullt, si dhe përdorimin e softuerëve të certifikuar për fiskalizim.
Sipas Tatimeve, çdo sjellje që synon shmangien tatimore e kategorizon subjektin si biznes me risk, duke hapur rrugën për kontrolle dhe monitorim të vazhdueshëm.
Theksi vihet veçanërisht te mosdeklarimi i punonjësve dhe nëndeklarimi i pagave, të cilat konsiderohen shkelje të rënda, pasi cenojnë drejtpërdrejt sigurimet shoqërore dhe të ardhmen pensionale të punëmarrësve.
Në këto raste, Tatimet paralajmërojnë hetime të plota për të gjithë aktivitetin e kompanisë, përfshirë analizimin e transaksioneve me burime të dyshimta financiare, në bashkëpunim me strukturat e tjera të ligjit.
Administrata Tatimore thekson se qëllimi i këtij aksioni është ulja e informalitetit në sektorin e ndërtimit dhe vendosja e drejtësisë sociale për punonjësit, duke sinjalizuar se toleranca ndaj shkeljeve do të jetë minimale.
