Vendimi i Amazon për të shkuratuar mijëra vende pune këtë javë ka shtuar shqetësimet se inteligjenca artificiale po zëvendëson punonjësit. Kompania u bashkua me një listë gjithnjë e më të gjatë firmash amerikane që kanë përmendur AI-në si arsye për reduktime.
Chegg uli 45% të stafit duke përmendur “realitetet e reja të AI-së”, ndërsa Salesforce shkurttoi 4,000 vende në shërbimin ndaj klientit, duke thënë se agjentët digjitalë po e bëjnë punën. Edhe UPS njoftoi 48,000 shkurtime që nga viti i kaluar, pjesërisht për shkak të automatizimit.
Megjithatë, ekspertët paralajmërojnë se nuk duhet fajësuar vetëm AI. Martha Gimbel nga Universiteti Yale tha se shpesh shkurtimet lidhen me faktorë ekonomikë apo specifika të kompanive. “Shumë njerëz reagojnë tepër sepse janë të frikësuar nga ndikimi i mundshëm i AI-së,” tha ajo, raporton BBC.
Studime të fundit tregojnë se efektet e para të ChatGPT janë ndier më shumë në punët administrative dhe zyrtare, ndërsa për profesionet teknologjike nuk është vërejtur ndryshim i madh. Ekspertët shtojnë se tregu i punës për këto kategori është bërë më i vështirë, por jo domosdoshmërisht për shkak të AI-së.
Amazon dhe kompani të tjera teknologjike kishin punësuar me ritme të larta gjatë pandemisë, prandaj reduktimet aktuale mund të lidhen edhe me normalizimin pas periudhës së zgjerimit dhe rritjen e normave të interesit nga Rezerva Federale.
Amazon pritet të shkurtojë rreth 14,000 vende pune dhe thotë se po bëhet “më efikase” për të përfituar nga mundësitë që sjell AI. Kompania vazhdon të ketë fitime të larta dhe, sipas analistëve, si prodhuese edhe përdoruese e teknologjisë, ajo është ndër të parat që ndjen ndikimin e automatizimit.
Ekspertët besojnë se, në vend që të zhduken, shumë vende pune do të riorganizohen, ndërsa tregu i punës do të përshtatet me rolet e reja që sjell inteligjenca artificiale. /Skyweb.al
