Ekonomia gjermane po përballet me një nga periudhat më të vështira të dekadave të fundit, duke goditur tashmë edhe sektorët tradicionalë të industrisë. Sipas një analize të publikuar nga revista prestigjioze The Economist, situata është përkeqësuar në atë pikë sa edhe fabrikat e sallamit, simbol i industrisë ushqimore gjermane, po detyrohen të mbyllen.
Rasti më domethënës është ai i fabrikës Eberswalder Wurstwerke, një emër historik në lindje të Gjermanisë. Në vitet e regjimit komunist, kjo ndërmarrje ishte prodhuesja më e madhe e sallameve në Europë, me rreth 3 mijë punonjës dhe një kompleks industrial që funksiononte si një qytet i vogël më vete.
Sot, realiteti është krejt tjetër. Fabrika në Britz pritet të mbyllet deri në fund të shkurtit 2026, duke lënë pa punë rreth 500 punonjës. Vendimi u mor nga kompania perëndimore Tönnies, e cila bleu fabrikën vetëm dy vite më parë, me premtimin për investime dhe modernizim.
Punonjësit kanë mësuar për mbylljen vetëm pak minuta përpara se lajmi të transmetohej në media, duke rritur edhe më shumë pasigurinë sociale në rajon.
Sipas The Economist, mbyllja e fabrikës nuk është një rast i izoluar, por pasojë direkte e një krize më të thellë ekonomike. Kostot e larta të energjisë, rritja e çmimeve të lëndëve të para, pagat, si dhe konsumi i dobët i qytetarëve, po e vënë industrinë gjermane nën presion të vazhdueshëm.
Modeli ekonomik i Gjermanisë, i mbështetur prej dekadash te industria e rëndë dhe eksportet, po rezulton gjithnjë e më pak konkurrues në kushtet e reja globale. Ndryshimet në tregjet ndërkombëtare, tranzicioni energjetik dhe dobësimi i kërkesës po e bëjnë të vështirë mbijetesën edhe për biznese që dikur konsideroheshin të qëndrueshme.
Analiza thekson se mbyllja e fabrikave ushqimore tradicionale është sinjal alarmi, pasi tregon se kriza nuk prek më vetëm industrinë e makinave apo sektorin e ndërtimit, por është shtrirë në gjithë ekonominë reale.
Për ekspertët, rasti i Eberswalder Wurst është një pasqyrë e qartë e gjendjes aktuale të ekonomisë gjermane, ku presioni financiar po “bluan” edhe sektorët më të vjetër dhe më simbolikë të vendit. /skyweb.al
