Një sipërfaqe prej rreth 10 mijë metrash katrorë territor dhe plazh publik në zonën e “Gjirit të Fshehur”, në Porto Palermo, raportohet se është rrethuar dhe përdoret si hapësirë private nga Vojo Peçi, vëllai i deputetit socialist Tërmet Peçi.
Denoncimi është bërë nga “Pamfleti”, sipas të cilit Vojo Peçi, i përmendur si oficer i antikrimit, ka rrethuar zonën me tela me gjemba dhe portë hekuri, duke kufizuar hyrjen e qytetarëve në një hapësirë bregdetare publike.
Artikulli shpjegon se kjo sipërfaqe nuk rezulton të jetë pronë e trashëguar, e blerë apo e marrë me qira nga shteti apo pronarë privatë, por është përvetësuar duke shfrytëzuar detyrën dhe lidhjet politike të vëllait të tij, deputetit Tërmet Peçi.
Brenda territorit të rrethuar, janë vendosur çadra, shezlongë, bujtina, parking dhe struktura të tjera, ndërsa hyrja lejohet vetëm për pushuesit që qëndrojnë aty ose për ata që paguajnë për plazh ditor.
qytetarë dhe turistë të huaj që kanë tentuar të hyjnë në këtë plazh janë përballur me kërcënime dhe dhunë nga persona të armatosur, të cilët pretendohet se qëndrojnë aty për të ruajtur territorin e rrethuar.
Rasti ngre pikëpyetje të forta për reagimin e institucioneve, pasi Bashkia Himarë, Policia e Shtetit dhe Inspektorati i Mbrojtjes së Territorit nuk rezulton të kenë ndërhyrë për lirimin e hapësirës publike.
Ndërkohë që publikohen këto pretendime, kryetari i Bashkisë Himarë, Vangjel Tavo, institucioni i të cilit ka nën administrim plazhet e zonës, sillet sikur nuk ka ndodhur asgjë. Në vend që të kërkojë verifikim dhe ndërhyrje për çdo rast të dyshuar zaptimi të bregdetit, Tavo vijon organizimin e aktiviteteve festive në Himarë.
Kritikat lidhen edhe me shpenzimet e bashkisë për koncerte dhe evente sezonale, ku pretendohet se po harxhohen dhjetëra milionë lekë nga paratë e taksapaguesve për ahengje, duke mbushur xhepat e këngëtarëve dhe personazheve publikë nga Tirana.
Një vit më parë, kryeministri Edi Rama kërkoi largimin nga radhët e Policisë të çdo punonjësi që kishte zaptuar toka, troje, lulishte, trotuare apo plazhe publike. Por në rastin e Porto Palermos, sipas denoncimit, nuk është ndërmarrë asnjë veprim konkret.
Në këtë histori ka edhe një tjetër element politik. Kryeministri Rama e ka denoncuar më herët sjelljen e Tërmet Peçit gjatë një mbledhjeje të PS-së në Gjirokastër, pikërisht për një qasje të tillë ndaj pushtetit dhe mënyrës se si disa zyrtarë e trajtojnë atë si pronë personale.
Por duket se Vangjel Tavo mendon ndryshe nga kryeministri, ose e ka mendjen te tenderat qindra milionë lekësh për ahengje me personazhe publike në shërbim të PR të tij në Himarë. Kujtojmë se Bashkia Himarë ka shpallur para disa javësh një tender 600 milionë lekë vetëm për ahengje gjatë gjithë vitit krahas shpenzimeve të majme për hapjen e sezonit turistik.
Ndërsa denoncimet për rrethimin e një plazhi publik në Porto Palermo presin reagim institucional, Bashkia Himarë vijon të shpenzojë me thasë paratë e taksapaguesve për koncerte, aktivitete festive dhe pagesa për këngëtarë e personazhe publikë nga Tirana.
Ndërkohë, në Zvërnec një gardh me tela me gjemba shkaktoi reagim qytetar dhe u hoq pas protestave. Por në Porto Palermo, pavarësisht denoncimeve, gardhi dhe porta hekuri vijojnë të qëndrojnë, kjo edhe për shkak të Bashkisë Himarë. /skyweb.al
