Çmimi i arit po përjeton një rritje historike, duke u shndërruar në një nga aktivet më të kërkuara të momentit nga investitorët globalë. Sipas një analize të The Economist, ari ka hyrë në një fazë ku çdo zhvillim, qoftë negativ apo pozitiv, po shndërrohet në nxitës të mëtejshëm të rritjes së çmimit.
Gjatë javëve të fundit, kërcënimet e Presidentit amerikan Donald Trump ndaj aleatëve europianë sollën një rritje të menjëhershme të çmimit të metalit të verdhë. Edhe kur këto kërcënime u tërhoqën, tendenca nuk u ndal. Përkundrazi, ari vijoi të rritet, duke arritur mbi 5 mijë dollarë për ons për herë të parë në histori më 26 janar. Që nga fillimi i vitit, çmimi është rritur me më shumë se 17 për qind, duke kaluar parashikimet që shumë analistë i kishin bërë për fundin e vitit 2026, ndonëse viti sapo ka nisur.
Sipas The Economist, ari ndodhet në qendër të asaj që njihet si tregtia e zhvlerësimit, një strategji ku investitorët, të shqetësuar nga shpenzimet e mëdha fiskale, tensionet gjeopolitike dhe dobësimi i normave institucionale, largohen nga obligacionet qeveritare dhe dollari, duke kërkuar strehë tek një nga aktivet më të vjetra dhe më të sigurta në histori.
Që prej momentit kur administrata Trump shpalli paketën e tarifave globale në prill të vitit të kaluar, tregjet financiare kanë shfaqur luhatje të forta. Indeksi S and P 500 ka rënë me më shumë se 1 për qind në 27 raste të ndryshme, ndërsa gjatë këtyre ditëve çmimi i arit është rritur mesatarisht me 0.6 për qind në ditë. Fenomeni bëhet edhe më domethënës nga fakti se ari nuk ngjitet vetëm në periudha krize.
Edhe në ditët kur tregjet e aksioneve shënojnë rritje të fortë, metali i çmuar vijon të forcohet. Në 24 ditë kur indeksi S and P 500 u rrit me më shumë se 1 për qind, ari u rrit mesatarisht me 0.2 për qind. Kjo sjellje e pazakontë tregon se ari po perceptohet gjithnjë e më shumë jo vetëm si mbrojtje ndaj krizave, por edhe si një aset bazë në strategjitë afatgjata të investitorëve.
Analiza e The Economist nënvizon se kombinimi i pasigurisë politike, tensioneve ndërkombëtare dhe frikës për stabilitetin financiar global po ushqen një kërkesë të vazhdueshme për arin. Në këtë klimë, metali i verdhë po thyen rekorde dhe po konfirmon rolin e tij si një nga barometrat kryesorë të pasigurisë globale.
