Çmimi i arit ka shënuar një tjetër rekord historik në tregjet ndërkombëtare. Të enjten, metali i çmuar u tregtua në nivelin e 5,600 dollarëve për onz, duke vijuar një rritje të fortë që vetëm tre ditë më parë e kishte çuar për herë të parë në 5,000 dollarë për onz.
Rritja e çmimit vjen në një kohë kur tregjet globale po përballen me luhatje të forta, duke shtyrë investitorët të orientohen drejt aseteve të sigurta për t’u mbrojtur nga pasiguritë gjeopolitike dhe ekonomike.
Një tjetër faktor që ka ndikuar pozitivisht është dobësimi i dollarit amerikan, i cili e bën arin më tërheqës për investitorët që operojnë me valuta të tjera.
Ari priret të performojë më mirë edhe në periudha me norma të ulëta interesi. Rezerva Federale e SHBA-së vendosi t’i mbajë normat e interesit të pandryshuara në mbledhjen e saj të fundit të politikës monetare në janar, duke mbështetur më tej kërkesën për metalin e çmuar.
Sipas analistëve, çmimi i arit mund të arrijë deri në 6,000 dollarë për onz gjatë këtij viti, i nxitur nga kërkesa e vazhdueshme për investime. Ndërkohë, tregje të rëndësishme si Shangai dhe Hong Kong kanë ruajtur një nivel të qëndrueshëm kërkese, pavarësisht çmimeve rekord.
Në rritjen e çmimit kanë ndikuar gjithashtu konfliktet në Ukrainë dhe Gaza, si dhe zhvillimet e tjera politike në arenën ndërkombëtare, të cilat po shtojnë pasigurinë globale dhe po forcojnë rolin e arit si strehë e sigurt për investitorët. /skyweb.al
