Qeveria po shkon drejt miratimit të një udhërrëfyesi kombëtar për arritjen e Objektivave të Zhvillimit të Qëndrueshëm deri në vitin 2030, një dokument që përcakton drejtimet kryesore të politikave publike për vitet në vijim.
Dokumenti përfshin fusha kyçe si lufta kundër korrupsionit, digjitalizimi, zhvillimi i bujqësisë, turizmit dhe energjisë, si dhe përmirësimi i shërbimeve publike dhe përfshirjes sociale.
Megjithatë, vetë relacioni shpjegues pranon se sistemi aktual përballet me probleme të rëndësishme, duke nisur nga mungesa e të dhënave të sakta për një pjesë të treguesve, deri te koordinimi i dobët ndërinstitucional dhe nevoja për më shumë burime financiare dhe njerëzore.
Në këtë kuadër, udhërrëfyesi synon të përmirësojë bashkërendimin mes institucioneve dhe të vendosë objektiva të matshme për vitin 2030, në përputhje me Agjendën globale të OKB-së dhe procesin e integrimit europian.
Por, pavarësisht ambicies së dokumentit, një element bie në sy: projektvendimi nuk parashikon efekte financiare shtesë për buxhetin e shtetit, duke ngritur pikëpyetje mbi mundësinë reale të zbatimit të objektivave të përcaktuara.
Plani parashikon gjithashtu forcimin e mekanizmave të monitorimit dhe raportimit, si dhe përcaktimin e përgjegjësive për institucionet që do të zbatojnë masat, në përpjekje për të rritur transparencën dhe llogaridhënien.
Udhërrëfyesi 2026–2030 shihet si dokumenti kryesor strategjik që do të orientojë politikat zhvillimore të vendit në vitet e ardhshme, në një kohë kur Shqipëria synon të përshpejtojë reformat dhe të afrohet më tej me standardet e Bashkimit Europian. /skyweb.al
