Sipas strukturave të Hetimit të Krimit Kibernetik, në internet dhe rrjetet sociale po qarkullojnë njoftime të falsifikuara, përmes të cilave persona të paidentifikuar paraqiten si përfaqësues të institucioneve financiare. Në këto raste, qytetarët nxiten të aplikojnë online për kredi, ndërsa qëllimi real është përfitimi i të dhënave personale dhe financiare.
Policia sqaron se këto skema mashtruese shfrytëzojnë faqe të dyshimta, mesazhe elektronike apo komunikime direkte në rrjete sociale, duke krijuar bindjen e rreme se bëhet fjalë për oferta zyrtare bankare.
Autoritetet bëjnë thirrje për kujdes të shtuar, duke theksuar se qytetarët nuk duhet të dërgojnë para, të dhëna bankare apo dokumente personale te persona apo platforma që nuk janë të verifikuara.
Po ashtu, rekomandohet që çdo aplikim për kredi të kryhet vetëm pasi të jetë konfirmuar informacioni nga burime zyrtare. Në rastet kur nuk është e mundur paraqitja fizike në degët bankare, Policia këshillon komunikim të drejtpërdrejtë vetëm përmes kontakteve zyrtare të publikuara nga institucionet financiare.
Policia e Shtetit u bën thirrje qytetarëve që çdo rast të dyshuar për mashtrim ta denoncojnë menjëherë, në mënyrë që këto raste të parandalohen dhe të hetohen në kohë. /skyweb.al
