Fëmijët po kalojnë gjithnjë e më shumë orë të lidhur pas telefonave celularë, duke rrezikuar të zhvillojnë varësi nga teknologjia, shkruan corriere.it. Si pasojë, loja në natyrë po zë gjithnjë e më pak vend në jetën e tyre, ndërsa ekrani i smartfonit po shndërrohet në formën kryesore, madje të vetme, të argëtimit.
Si mund të ndryshohet ky realitet?
Sipas psikologes dhe ekspertes së arsimit Jessica Alexander, “metoda daneze për rritjen e fëmijëve të lumtur është një nga mënyrat më efektive për t’i larguar ata nga varësia ndaj telefonit”.
Kjo qasje, e njohur si “kutia e telefonave”, bazohet në rregulla të përbashkëta familjare dhe, mbi të gjitha, në shembullin e prindërve. Metoda është e thjeshtë dhe funksionon sepse kthehet në një normë familjare, jo në një formë ndëshkimi.
Si funksionon metoda daneze
Në shtëpi vendoset një kuti ose një hapësirë e përbashkët ku, në orare të caktuara, të gjithë anëtarët e familjes – përfshirë prindërit – lënë telefonat e tyre. Kjo zakonisht ndodh gjatë vakteve, pas shkollës për 1–2 orë dhe në mbrëmje pas një ore të caktuar.
Nëse telefoni nuk lejohet për fëmijët, atëherë nuk përdoret as nga të rriturit. Shembulli personal është thelbësor për suksesin e metodës.
Çfarë bëjnë fëmijët në vend të telefonit
lojëra tavoline
sport ose shëtitje
lexim
biseda familjare
aktivitete kreative si vizatimi, ndërtimi apo muzike
Kjo metodë synon të krijojë një ekuilibër të shëndetshëm mes teknologjisë dhe jetës reale, duke i ndihmuar fëmijët të zhvillojnë zakone më të mira dhe marrëdhënie më të forta me familjen.
