Autoriteti i Komunikimeve Elektronike dhe Postare ka nxjerrë për konsultim publik një paketë të re rregullash që synon të garantojë të ashtuquajturin “internet i hapur”, duke vendosur kufij të qartë ndaj praktikave të bllokimit, ngadalësimit apo favorizimit të aplikacioneve dhe faqeve të caktuara nga operatorët.
Projekt-udhëzimi prek drejtpërdrejt mënyrën se si qytetarët përdorin internetin në jetën e përditshme, si në celular, ashtu edhe në shtëpi, në punë apo në shkollë. Parimi bazë është që operatorët nuk duhet të ndërhyjnë në përzgjedhjen e përmbajtjes, shpejtësisë apo cilësisë së shërbimit për aplikacione apo faqe të veçanta, për arsye tregtare apo kontraktuale.
Sipas dokumentit, çdo përdorues ka të drejtë për akses të plotë dhe të barabartë në të gjitha faqet e internetit, rrjetet sociale, aplikacionet e komunikimit, platformat video apo shërbimet online të mësimit dhe punës, për aq kohë sa përmbajtja është e ligjshme. Nuk lejohet që disa shërbime të funksionojnë më shpejt ose më mirë se të tjerat për shkak të marrëveshjeve mes operatorëve dhe platformave.
AKEP thekson se praktika si ofrimi i “internetit falas” vetëm për disa aplikacione, apo trajtimi preferencial i platformave partnere, bien ndesh me parimin e internetit të hapur. Sipas rregullave të propozuara, operatorët nuk duhet të krijojnë një “internet me dy shpejtësi”, ku një pjesë e përmbajtjes privilegjohet dhe pjesa tjetër penalizohet.
Dokumenti lejon që operatorët të ofrojnë paketa të ndryshme interneti, me shpejtësi dhe limite të ndryshme përdorimi, por vendos një vijë të kuqe të qartë. Në rast se shpejtësia e internetit ulet pas konsumimit të paketës, kjo ulje duhet të zbatohet në mënyrë të barabartë për të gjithë trafikun dhe jo vetëm për aplikacione apo faqe të caktuara.
Një pjesë e rëndësishme e projekt-udhëzimit lidhet me transparencën ndaj konsumatorit. Operatorët do të jenë të detyruar të informojnë qartë përdoruesit për shpejtësinë reale të shërbimit, kushtet e kontratës, mënyrat e menaxhimit të trafikut dhe të ofrojnë mekanizma ankese kur shërbimi nuk përputhet me atë që është premtuar.
Rregullat e reja parashikojnë gjithashtu një rol më aktiv të AKEP në monitorimin e tregut, duke i dhënë institucionit bazë më të fortë ligjore për të ndërhyrë dhe për të marrë masa korrigjuese në rast shkeljesh nga operatorët.
Projekt-udhëzimi është pjesë e procesit të përafrimit të legjislacionit shqiptar me standardet e Bashkimit Evropian dhe pritet të ndikojë drejtpërdrejt në mënyrën se si ofrohet dhe përdoret interneti në Shqipëri. /skyweb.al
