Mbledhja e sotme e Këshillit Bashkiak të Durrësit u shoqërua me tensione të forta dhe u mbyll pa asnjë vendim konkret për familjet e prekura nga projekti TID, duke thelluar konfliktin mes banorëve dhe pushtetit vendor.
Pas protestave jashtë bashkisë, një përfaqësuese e banorëve u lejua të marrë pjesë në mbledhje, por debati u përshkallëzua menjëherë.
Përplasjet verbale mes këshilltarëve të mazhorancës dhe qytetarëve shoqëruan diskutimin e pikës 13 të rendit të ditës, e cila parashikonte miratimin e bonusit të qirasë për familjet që duhet të largohen nga banesat e tyre për shkak të projektit TID.
Situata u tensionua edhe më tej pasi një pjesë e protestuesve u shoqëruan në polici, ndërsa këshilltarët e Partisë Demokratike kërkuan lirimin e tyre dhe braktisën sallën, duke iu bashkuar banorëve në protestë. Si pasojë, mazhoranca socialiste vendosi të mos e hedhë në votim pikën për subvencionimin e qirave pa praninë e opozitës, duke e shtyrë vendimmarrjen për një mbledhje të ardhshme.
RAPORTIM I GAZETARES LULJETA PROGNI NË BIRN MBI PROJEKTIN TID
Në qendër të kundërshtimit janë vetë pasojat e projektit TID. Banorët e zonës historike të Durrësit kundërshtojnë shpronësimet dhe vlerat e dëmshpërblimit, të cilat, sipas tyre, janë shumë më të ulëta se çmimi real i tregut dhe nuk u mundësojnë blerjen e një banese të re. Ata kërkojnë zgjidhje të menjëhershme strehimi dhe jo thjesht premtime për kompensim financiar.
Projekti TID parashikon shembjen e dhjetëra banesave në qendrën historike të qytetit, në zonën përreth amfiteatrit antik dhe objekteve të tjera arkeologjike, me synimin e rijetëzimit urban të kësaj hapësire. Vendimi për shpronësimet është miratuar me Vendim të Këshillit të Ministrave dhe përfshin dhjetëra pronarë privatë, ndërsa bashkia thekson se projekti nuk është hartuar prej saj, por nga institucionet qendrore.
Sipas bashkisë, në parim është miratuar një fond prej rreth 867 milionë lekësh për shpronësimet, por banorët thonë se këto vlera nuk mbulojnë realisht humbjen e pronës dhe investimeve të jetës së tyre. Për këtë arsye, ata kërkojnë që përpara çdo prishjeje, bashkia dhe qeveria të garantojnë strehim dhe trajtim të drejtë.
Shtyrja e mbledhjes dhe mosvotimi i bonusit të qirasë kanë lënë sërish pa përgjigje dhjetëra familje, ndërsa konflikti për projektin TID mbetet i hapur. Për banorët, ajo që ndodhi sot në Këshillin Bashkiak është një tjetër dëshmi se vendimet për jetën e tyre po merren pa dialog dhe pa zgjidhje konkrete. /skyweb.al
