Zhvillimet në dosjet që lidhen me hetimet për tenderat publikë dhe institucionet kyçe të teknologjisë në vend po shoqërohen me një tjetër largim në nivelet më të larta të administratës. Sekretari i Përgjithshëm i Kryeministrisë, Engjëll Agaçi, është larguar nga detyra, ndërsa ende nuk është sqaruar nëse bëhet fjalë për dorëheqje apo shkarkim.
Sipas MCN TV, largimi i tij vjen në një moment kur paraditen e së njëjtës ditë ai u paraqit në Prokurorinë e Posaçme, ku qëndroi për rreth tre orë. Në dalje, Agaçi konfirmoi se është pyetur në lidhje me çështjen e inceneratorit të Tiranës dhe theksoi se mbetet në dispozicion të organeve të drejtësisë.
Ky zhvillim pason shkarkimin nga detyra të ish-drejtoreshës së Agjencisë Kombëtare të Shoqërisë së Informacionit, Mirlinda Karçanaj, ndaj së cilës gjykata ka caktuar masën e arrestit shtëpiak. E njëjta masë është vendosur edhe për zëvendësen e saj Hava Delibashi, në kuadër të hetimeve që lidhen me abuzime të dyshuara në tendera publikë.
Në krye të AKSHI-t pritet të emërohet Igli Tafa, i cili prej tetorit 2022 drejton Autoritetin Kombëtar për Sigurinë Kibernetike dhe mban rolin e Koordinatorit Kombëtar për Sigurinë Kibernetike.
Ndërkohë, në të njëjtën çështje, Gjykata e Apelit ka lënë në fuqi masën e pezullimit nga detyra për zëvendësdrejtorin e Policisë së Tiranës, Erion Ismailaj, si dhe masën e detyrimit për paraqitje për biznesmenët Gëzim Hoxha, Andis Papa dhe Rogers Rryta.
Sipas hetimeve, të pandehurit dyshohet se kanë vepruar në formën e një grupi të strukturuar kriminal, duke abuzuar në mënyrë sistematike me tendera publikë të lidhur me projektet e AKSHI-t. Zhvillimet e fundit tregojnë një zgjerim të rrethit të hetimeve dhe një rritje të presionit institucional në një nga dosjet më të ndjeshme që lidhen me prokurimet publike dhe infrastrukturën digjitale të shtetit. /skyweb.al
