Administrata Tatimore ka publikuar zyrtarisht linkun përmes të cilit çdo individ mund të verifikojë nëse ka detyrim për të plotësuar Deklaratën Individuale Vjetore të të Ardhurave për vitin 2025, e njohur si DIVA.
Qytetarët mund të kontrollojnë statusin e tyre përmes shërbimit elektronik “Tax Test” në faqen zyrtare të Tatimeve:
https://www.tatime.gov.al/c/3/10/652/deklarata-individuale-vjetore-e-te-ardhurave
Ky test funksionon si një pyetësor i thjeshtë orientues që jep përgjigje të menjëhershme nëse individi klasifikohet apo jo si subjekt deklarimi për vitin 2025.
Sipas njoftimit zyrtar, shërbimi nuk kërkon hyrje me emër përdoruesi apo fjalëkalim, nuk mbledh të dhëna konfidenciale dhe bazohet në disa pyetje bazike mbi nivelin dhe burimin e të ardhurave.
Testi është i vlefshëm si për rezidentët ashtu edhe për jorezidentët që kanë realizuar të ardhura në Shqipëri.
Afati për dorëzimin dhe pagesën e DIVA 2025 është 31 mars 2026. Subjekt deklarimi janë individët që gjatë vitit 2025 kanë realizuar të ardhura bruto 1.200.000 lekë ose më shumë nga të gjitha burimet, jo vetëm nga paga; ata që kanë qenë në më shumë se një marrëdhënie pune për të paktën një muaj; si dhe individët që kanë përfituar mbi 50.000 lekë të ardhura për të cilat nuk është mbajtur tatim në burim, përfshirë qiradhënien apo të ardhurat nga platforma si Booking apo AirBnB.
Administrata Tatimore sqaron se edhe individët që nuk kanë detyrim të drejtpërdrejtë, por plotësojnë kushtet për rimbursim për fëmijët në ngarkim apo për shpenzime arsimore, duhet të dorëzojnë deklaratën për të përfituar zbritjet përkatëse. Publikimi i linkut synon të shmangë paqartësitë dhe penalitetet, duke u dhënë qytetarëve mundësinë të kontrollojnë paraprakisht nëse duhet të kryejnë deklarimin. /skyweb.al
