Tarifat e energjisë elektrike për një pjesë të konsumatorëve në vend pritet të ndryshojnë si pasojë e procesit të verifikimit të kontratave që ka nisur Furnizuesi i Shërbimit Universal, pjesë e OSHEE Group. Nisma synon të korrigjojë rastet kur subjekte që ushtrojnë aktivitet ekonomik vijojnë të faturohen si klientë familjarë, duke paguar më pak se tarifa që u takon.
Sipas të dhënave të institucionit, kontrolli po përqendrohet kryesisht te ambientet në katet e sipërme të ndërtesave shumëkatëshe dhe njësi të tjera që rezultojnë të përdoren për biznes, por që nuk kanë përditësuar kontratën. Në këto raste, diferenca e tarifës është e ndjeshme, pasi klientët familjarë paguajnë rreth 8.5 deri në 9.5 lekë për kilovat/orë, ndërsa për bizneset tarifa arrin në 14 lekë për kilovat/orë.
Administratori i FSHU, Algert Luzi tha në një intervistë për Monitor se procesi parashikon që, kur konstatohet një aktivitet ekonomik, subjektit i lihet një afat për të përditësuar të dhënat dhe për të lidhur kontratën sipas kategorisë përkatëse. Nëse procedura nuk ndiqet brenda afatit, kontrata kalon automatikisht në tarifën e biznesit, duke reflektuar menjëherë ndryshimin në faturë.
Ndryshimi nuk prek profesionistët e lirë apo personat që punojnë nga shtëpia, për sa kohë banesa vazhdon të përdoret për qëllime banimi dhe aktiviteti nuk zhvillohet në një ambient të dedikuar vetëm për biznes. Në këto raste, kontrata mbetet familjare dhe tarifimi nuk ndryshon.
Autoritetet e energjisë e konsiderojnë këtë proces si një hap drejt tarifimit më të drejtë dhe formalizimit të konsumit, duke synuar që çdo kategori klientësh të paguajë sipas përdorimit real të energjisë. Në praktikë, kjo do të thotë se një pjesë e bizneseve do të përballen me kosto më të larta energjie, ndërsa për konsumatorët familjarë nuk parashikohen ndryshime në tarifë. /skywbe.al
