Aditivët që shtohen në ushqimet e përpunuara për t’i mbajtur më të freskëta për më gjatë mund të kenë një efekt të papritur mbi shëndetin e mikrobeve në zorrët tona, shkruan BBC.
Brenda secilit prej nesh ekziston një komunitet i gjallë me triliona qeliza që ndikon në shumë aspekte të shëndetit tonë. Këtë e quajmë “mikrobioma” jonë.
“Mund ta mendoni diversitetin e zorrëve si një pyll. Sa më shumë mikrobe dhe sa më shumë lloje të ndryshme mikrobesh të keni në ‘pyllin’ tuaj, aq më e madhe është qëndrueshmëria ndaj çdo shqetësimi,” thotë Melissa Lane, epidemiologe ushqimore në Universitetin Deakin.
Shkenca e ka konfirmuar prej kohësh se një mikrobiomë e shëndetshme dhe e larmishme është thelbësore për mirëqenien tonë të përgjithshme, pasi ndikon në gjithçka, nga humori te metabolizmi dhe madje edhe funksionimi i trurit.
Ata që kanë një diversitet më të ulët bakterial në zorrë janë më të prirur ndaj problemeve me gjumin, shëndetit më të dobët të zorrëve dhe inflamacionit më të lartë, ndërsa një diversitet i lartë lidhet edhe me jetëgjatësi më të madhe. “Është një ekosistem i tërë. Është si një organ shtesë që kemi në trupin tonë,” shpjegon Sarah Berry, profesoreshë e ushqyerjes në King’s College London.
Por disa nga ushqimet që konsumojmë zakonisht mund të dëmtojnë këtë ekosistem, sugjerojnë provat shkencore. Veçanërisht ushqimet ultra të përpunuara (UPF) mund të prishin dhe ndryshojnë mikrobet në zorrët tona.
Dhe një nga arsyet gjithnjë e më shumë po i atribuohet numrit të madh të aditivëve në ushqim. Kjo më bëri të pyes se çfarë bëjnë këta aditivë në zorrët tona. Nëse shikoni listën e përbërësve herën tjetër që jeni në supermarket, do të vini re shpejt sa shumë emulsifikues, ëmbëltues artificialë dhe ngjyrues ushqimorë shtohen në ushqime.
Ata bëjnë gjithçka, nga përmirësimi i shijes apo rritja e krokantësisë, te ndryshimi i teksturës dhe zgjatja e afatit të ruajtjes.
Normalisht, mikrobet e zorrëve mbahen në një distancë të sigurt nga muri i zorrës nga një shtresë mukusi që vesh zorrën dhe ndihmon në parandalimin e inflamacionit. Kur bakteret depërtojnë në këtë shtresë mbrojtëse, mund të shkaktojnë sëmundje inflamatore kronike, thotë Chassaing. Studime pasuese korrelative kanë lidhur efekte të pafavorshme edhe te njerëzit. Një studim francez me më shumë se 100,000 të rritur në vitin 2024 zbuloi se ata që ishin më të ekspozuar ndaj emulsifikuesve kishin një rrezik më të lartë për diabet të tipit 2. Një tjetër studim me më shumë se 90,000 të rritur gjeti një lidhje të mundshme midis emulsifikuesve dhe kancerit të gjirit dhe prostatës.
Kevin Ëhelan, profesor i dietetikës në King’s College London, dhe Chassaing kanë bashkëpunuar së fundmi në një provë klinike me persona që vuanin nga sëmundja e Crohn-it. Studimi zbuloi se ata që ndoqën një dietë me kufizim të emulsifikuesve kishin tre herë më shumë gjasa të përjetonin ulje të simptomave, krahasuar me ata që konsumonin një sasi të zakonshme emulsifikuesish në dietën e tyre. /skyweb.al
