Një lidhje e veçantë mes nënës dhe fëmijës së saj duket se kapërcen çdo pengesë, përfshirë edhe atë të gjuhës. Një studim i realizuar nga University of Nottingham në Britaninë e Madhe, kryesisht me familje me përbërje multikulturore, ka zbuluar se gjatë lojës truri i nënës dhe ai i fëmijës sinkronizohen, edhe kur komunikimi zhvillohet në një gjuhë të dytë.
Shumë persona që përdorin dy gjuhë në jetën e përditshme raportojnë një ndjesi distance emocionale kur nuk flasin në gjuhën amtare. Kjo ndjesi mund të ndikojë në mënyrën se si përcillen dashuria, afeksioni dhe empatia në marrëdhënien prind-fëmijë.
Për të analizuar këtë fenomen, studiuesit zhvilluan një eksperiment në tre faza. Në fazën e parë, nëna luante me fëmijën duke përdorur gjuhën e saj amtare. Në fazën e dytë, komunikimi bëhej vetëm në anglisht. Ndërsa në fazën e tretë, nënë e fëmijë luanin në heshtje të plotë, të ndarë nga një barrierë fizike.
Gjetjet rezultuan befasuese: u vu re një sinkronizim i valëve të trurit mes nënës dhe fëmijës, sidomos në zonat që lidhen me vendimmarrjen, planifikimin, arsyetimin dhe përpunimin e emocioneve. Madje, ky sinkronizim rezultoi edhe më i fortë se në rastet kur ndërveprimi zhvillohej përmes komunikimit verbal. skyweb.al
