Në kodrat e vetme të gjelbërta të Ksamilit, brenda zonës buferike të Parkut Kombëtar të Butrintit, pritet të ngrihet një hotel luksoz me pamje bunker, me miratimin e drejtpërdrejtë të ministres së Turizmit dhe Mjedisit, Mirela Kumbaro.
Skyweb.al mëson se ky vendim i fundit vjen pas një sërë lejesh të dhëna më herët nga ministrja në disa zona të mbrojtura të vendit, duke përfshirë Gjirin e Manastirit, zonën e Llamanit në Himarë, Butrintin dhe tashmë sërish në Sarandë.
Vendimi i Këshillit Kombëtar të Territorit dhe Ujit, i marrë disa muaj më parë, mban numrin 25 të vitit 2024 dhe është firmosur edhe nga ministrja Kumbaro.
Leja parashikon ndërtimin e një kompleksi hotelier me 3 kate mbi tokë dhe 4 kate nëntokë, i cili do të ndërtohet në parcelat me numër pasurie 7/493 dhe 7/494, me sipërfaqe totale ndërtimi mbi 1.800 metra katrorë.
Projekti përfshin një godinë me volum të konsiderueshëm beton-arme, me lartësi deri në 16.20 metra në fasadë, 42 dhoma akomodimi, pishinë, ambiente spa, dhe 97 vende parkimi në kate të nëndheshme. Në dokumentet zyrtare specifikohet se fasadat do të trajtohen me gur dhe materiale të tjera natyrore, për t’iu përshtatur stilit lokal të Ksamilit, por pamja përfundimtare i ngjan më shumë një strukture masive bunkerike.
Skyweb.al mëson gjithashtu se pas kompanisë zhvilluese “Epidamn C” sh.p.k qëndron biznesmeni Klajd Qato, i njohur për publikun shqiptar që nga tragjedia e 26 nëntorit 2019 në Durrës, kur shpëtoi fatmirësisht nga rrënojat e Vila Palma pas tërmetit.
Pas verifikimeve të policisë rezultoi se hoteli në Durrës ishte ndërtuar në shkelje të lejes ndërtimore, me 8 kate në vend të 6 të lejuarave, duke sjellë pasoja të rënda me viktima.
Ndërtimi i hotelit të ri në Ksamil ngre sërish pikëpyetje të forta për mënyrën si po trajtohen zonat e mbrojtura natyrore në vend. Edhe pse kodrat e Ksamilit i përkasin zonës buferike të Parkut Kombëtar të Butrintit, lejet e reja po i hapin rrugën betonizimit të peizazhit të fundit të paprekur natyror në bregdetin jugor.
Ndërkohë, miratimi i kësaj lejeje nga ministrja Kumbaro e shton edhe më tej listën e vendimeve të saj të debatuara që kanë lejuar ndërtime në zona me status mbrojtjeje, duke thelluar debatet publike për fatin e mjedisit dhe turizmit natyror në Shqipëri. /skyweb.al
