Rritja e kërkesës për energji për shkak të temperaturave të larta të javëve të fundit, e kombinuar me mungesën e reshjeve dhe uljen e prodhimit nga hidrocentralet, ka detyruar Korporatën Elektroenergjetike Shqiptare (KESH) të kthehet sërish në tregun ndërkombëtar për të siguruar energji elektrike. Brenda një periudhe prej 15 ditësh, KESH ka zhvilluar katër tenderë për blerjen e energjisë, me një vlerë totale të shpenzuar prej rreth 14 milionë eurosh.
Energjia e siguruar me këto procedura, me një çmim mesatar rreth 95 euro për megavat-orë (MWh), do të mbulojë konsumin deri më 22 qershor. Blerjet e fundit vijnë pas një periudhe prej rreth tre muajsh ku KESH nuk kishte realizuar importe energjie, pasi tenderi i fundit ishte zhvilluar në mes të muajit mars.
Sipas të dhënave zyrtare të publikuara nga KESH, gjatë këtij viti janë blerë gjithsej rreth 408 mijë MWh energji me një çmim mesatar prej 124 euro për MWh. Vetëm në tre muajt e parë të vitit, tenderët e zhvilluar kanë arritur një faturë totale prej 38 milionë eurosh, ndërsa me përfshirjen e blerjeve të fundit, fatura totale për vitin 2025 ka arritur tashmë rreth 52 milionë euro.
Kjo situatë paraqet një dinamikë të ndryshme krahasuar me vitin 2024, kur prodhimi i qëndrueshëm i hidrocentraleve të Kaskadës së Drinit bëri të mundur që deri në muajin qershor të mos realizohej asnjë blerje importi. Gjatë gjithë vitit të kaluar, fatura e përgjithshme për blerjen e energjisë arriti në rreth 70 milionë euro.
Pavarësisht situatës më të qëndrueshme në pjesën e parë të vitit, varësia e sistemit energjetik shqiptar nga kushtet hidrike mbetet e lartë, duke e bërë tregun e brendshëm të energjisë të ndjeshëm ndaj çdo devijimi të kushteve klimatike dhe rritjes së papritur të konsumit. /skyweb.al
