Trashëgimia kulturore shqiptare ka njohur rritje të ndjeshme të vizitueshmërisë gjatë vitit 2024, sipas të dhënave zyrtare të publikuara nga INSTAT. Muze, kala, monumente dhe parqe arkeologjike kanë pritur një numër rekord vizitorësh, duke reflektuar interesin në rritje për destinacionet historike dhe kulturore të vendit.
Në total, 468.839 persona kanë vizituar muzetë e vendit gjatë vitit 2024, shifër kjo që shënon një rritje prej 19,7 për qind krahasuar me një vit më parë. Rritje edhe më të lartë ka shënuar numri i vizitorëve në kalatë dhe monumentet e tjera historike, ku janë regjistruar 344.785 vizita, me një rritje vjetore prej 27 për qind.
Ndërkohë, parqet arkeologjike kanë pasur një rritje të ndjeshme prej 46,2 për qind, duke arritur në 501.375 vizitorë përgjatë vitit të kaluar. Ky trend pozitiv pasqyron jo vetëm interesin e turistëve vendas dhe të huaj, por edhe rëndësinë që po merr trashëgimia kulturore në ofertën turistike të Shqipërisë.
Sipas të dhënave të INSTAT, Kalaja e Gjirokastrës rezulton të jetë objekti më i vizituar i trashëgimisë kulturore për vitin 2024. Pas saj renditet Parku Arkeologjik i Butrintit, ndërsa në vendin e tretë vjen Muzeu Kombëtar “Gjergj Kastrioti Skënderbeu” në Krujë.
Ekspertët e turizmit e shohin këtë tendencë si sinjal pozitiv për zhvillimin e turizmit kulturor në Shqipëri, ndërkohë që kërkojnë më shumë investime në ruajtjen dhe promovimin e këtyre vlerave, në mënyrë që ky potencial të shfrytëzohet në mënyrë të qëndrueshme në vitet në vijim./skyweb.al
