Koreja e Jugut ruan vendin e parë si origjina kryesore e automjeteve të importuara në Shqipëri. Sipas të dhënave të Drejtorisë së Përgjithshme të Transportit Rrugor (DPSHTRR), në periudhën janar–maj 2025 janë regjistruar për herë të parë 7,753 automjete nga ky shtet, që përbëjnë 20.4% të totalit.
Edhe në vitin 2024, Koreja e Jugut kryesoi për herë të parë listën e vendeve importuese, me 18,800 automjete të regjistruara ose 19% të totalit. Rritja është nxitur nga çmimet e leverdishme dhe procedurat e thjeshta të blerjes, të cilat kryhen online përmes agjencive të transportit ose drejtpërdrejt nga agjencitë që ofrojnë mjete të sigurua.
Një arsye tjetër e fortë pse automjetet koreane po preferohen është edhe politika mjedisore e qeverisë së Koresë së Jugut. Aty ka nisur një lëvizje kombëtare për ta bërë vendin “green”, duke subvencionuar qytetarët dhe bizneset për të larguar mjetet me lëndë djegëse dhe për t’i zëvendësuar me automjete elektrike. Si pasojë, shumë automjete me motorë klasikë shiten për një çmim shumë më të ulët se ai i tregut, ndërsa pronarët përfitojnë edhe një vlerë shtesë nga subvencionet qeveritare.
Pas Koresë së Jugut, për 5-mujorin e parë të 2025-ës, Italia renditet e dyta me 6,116 automjete (16%), e ndjekur nga Gjermania me rreth 6,000 mjete (15.9%), Zvicra me 3,400 mjete (9%), SHBA-ja me gati 3,000 mjete (7.8%) dhe Kina me 2,800 mjete (7.3%).
Viti 2024 shënoi rekord historik me 99,400 automjete të regjistruara për herë të parë, shumica autovetura, ku prurjet nga Koreja e Jugut patën peshën kryesore. Megjithatë, në 2025 kërkesa ka filluar të bjerë, pasi shumë biznese dhe individë kanë përmbushur nevojat për mjete, duke ndikuar edhe në uljen e të ardhurave doganore. Në 5-mujorin e parë, importi i automjeteve të përdorura uli të ardhurat e buxhetit me 665 milionë lekë, ndërsa ai i automjeteve të reja me 333 milionë lekë.
Pavarësisht fluksit të viteve të fundit, flota shqiptare e automjeteve mbetet e vjetër, me 73% të autoveturave në qarkullim mbi 15 vjet./skyweb.al
