Në Shqipëri mund të blesh më lirë veshje e këpucë dhe të paguash më pak për informacionin dhe komunikimin, por pjesa tjetër e jetesës vazhdon të shtrenjtohet. Kjo është tabloja që japin të dhënat më të fundit të INSTAT-it për muajin gusht.
Inflacioni arriti në 3,2%, nga 2,3% që ishte në të njëjtën periudhë të vitit të kaluar. Krahasuar me korrikun, çmimet u rritën me 0,1%. Sipas INSTAT-it, dy grupet e vetme që shënuan ulje vjetore ishin “Veshje dhe këpucë” dhe “Informacioni dhe komunikimi”.
Çmimet e veshjeve dhe këpucëve ranë me 3,2% krahasuar me gushtin e vitit të kaluar, ndërsa grupi “Informacioni dhe komunikimi”, ku përfshihen pajisjet dhe shërbimet e komunikimit, u ul me 1%.
Në ndikimin e përgjithshëm mbi inflacionin, veshjet dhe këpucët kontribuuan me -0,12 pikë përqindjeje, ndërsa informacioni dhe komunikimi me -0,04 pikë përqindjeje.
ÇMIMET/ Ushqimet dhe transporti “shpojnë” xhepat e shqiptarëve
Por ajo që shqiptarët kursejnë te këpucët dhe informacioni e humbasin shumëfish te transporti, ushqimet dhe kostot e banesës.
Rritja më e fortë vjetore u regjistrua në transport, ku çmimet u shtrenjtuan me 12%. Ky grup i shtoi inflacionit 0,79 pikë përqindjeje.
Ushqimet dhe pijet joalkoolike u shtrenjtuan me 2,8%, por për shkak të peshës së madhe që zënë në buxhetet familjare, ato dhanë ndikimin kryesor në inflacion, me 0,95 pikë përqindjeje.
Edhe grupi “Qira, ujë, energji elektrike, gaz dhe karburante të tjera” shënoi rritje me 3,7%, duke kontribuuar me 0,76 pikë përqindjeje në inflacionin vjetor.
Rritje të ndjeshme pati edhe te argëtimi, sporti dhe kultura me 5,4%, sigurimet dhe shërbimet financiare me 4,6%, si dhe te mobiliet, pajisjet e shtëpisë dhe kujdesi personal me nga 2,8%.
Vetëm gjatë muajit gusht, transporti u shtrenjtua me 3,9%. Në të kundërt, veshjet dhe këpucët u liruan me 1,1%, ushqimet me 0,4%, pijet alkoolike dhe duhani me 0,3%, ndërsa mobiliet dhe pajisjet e shtëpisë me 0,1%.
Pra, statistikat tregojnë se në Shqipëri këpucët dhe informacioni kushtojnë më pak se një vit më parë, por ushqimi, lëvizja dhe çatia mbi kokë vazhdojnë ta bëjnë jetesën gjithnjë e më të shtrenjtë.
