Drejtoria e Përgjithshme e Shërbimeve të Transportit Rrugor njofton se gjatë muajit janar 2026 janë kontrolluar 32.991 mjete në të gjithë vendin, duke shënuar një rritje prej 19% krahasuar me të njëjtën periudhë të vitit 2025. Sipas institucionit, ky tregues reflekton një ndërgjegjësim në rritje të qytetarëve për rëndësinë e kontrollit teknik dhe të sigurisë në qarkullimin rrugor.
Kontrollet kanë pasur si qëllim garantimin e standardeve të sigurisë, duke parandaluar aksidentet që mund të shkaktohen nga defektet teknike. Një pjesë e konsiderueshme e mjeteve të verifikuara kanë rezultuar me mangësi, por pas riparimeve të nevojshme janë rikthyer në qarkullim duke përmbushur parametrat e kërkuar. Sipas DPSHTTR, siguria në rrugë nis me një automjet të kontrolluar dhe në gjendje të mirë teknike.
Paralelisht me procesin e verifikimeve, gjatë muajit janar janë çregjistruar përfundimisht 882 mjete të vjetra dhe të amortizuara. Ky hap vlerësohet si i rëndësishëm jo vetëm për reduktimin e rrezikut në rrugë, por edhe për përmirësimin e cilësisë së ajrit, pasi automjetet e amortizuara konsiderohen ndër burimet kryesore të ndotjes.
Drejtoria u bën thirrje qytetarëve që të tregohen të përgjegjshëm dhe të rezervojnë online takimin për kontrollin teknik përmes platformës e-Albania, me synim rritjen e standardeve të sigurisë rrugore në vend. /skyweb.al
