Sipas studimit të fundit nga Investropa, nxjerr në pah disa të dhëna interesante për sa i përket çmimit dhe kërkesës së tregut të qirave në kryeqytet, ku ka edhe kërkesat më të shumta.
Sipas studimit, çmimi mesatar i një banese me qira varion varësi të shumë faktorëve si: zona, investimet, mobilimi apo edhe lloji i ndërtimit.
Një tjetër faktor shumë i rëndësishëm është zona ku qytetarët e Tiranës vendosin të gjejnë banesën e tyre. Sipas të dhënave të grumbulluara rezulton se për profesionistët e rinj, më së shumti apartamentet me qira janë marrë në: Bllok, Tiranën e Re dhe Myslym Shyri.
Në këto zona, një apartament 1+1 ose 2+1 i vogël jepet me qira mesatarisht nga 45,000 deri në 70,000 lekë në muaj (rreth 450–700 euro), në varësi të mobilimit dhe standardit të ndërtesës.
Ajo që i tërheq më shumë të rinjtë janë lidhjet e mira me transportin publik, ndërtesat e reja ose të rikonstruktuara dhe mundësia për të pasur një jetë sociale aktive vetëm pak hapa larg shtëpisë.
Ndërkohë, zonat të cilat rezultojnë më të preferuarat dhe të banuarat nga familjarët janë: Selita, Kodra e Diellit si dhe Sauku. Qiratë për apartamente në këto zona variojnë nga 60,000 deri në 100,000 lekë në muaj (600–1,000 euro).
Familjet kërkojnë kryesisht planimetri më të bollshme, parkim të dedikuar dhe më pak zhurmë. Një faktor vendimtar mbetet edhe arsimi, ku veçanërisht në Selitë funksionojnë shkolla publike të vlerësuara mirë dhe një rrjet kopshtesh private në zgjerim.
Ndërkohë, për sa i përket zonave ku merren më shumë apartamente me qira, sigurisht janë ato të cilat mbajnë numrin më të lartë të studentëve.
Sipas studimit, përveç zonës së Qytetit të Studentit, Zogu i Zi dhe Unaza e Re në afërsi të Astirit kanë numër shumë të lartë banesash që merren me qira. Vlen të përmendet fakti se këto lagje kanë edhe një lidhje të mirë me transportin urban.
Në këto zona me kërkesë të lartë, një pronë e pozicionuar dhe e çmuar saktë qëndron në treg vetëm 10 deri në 25 ditë, ndërkohë që në pjesë të tjera të kryeqytetit afati mesatar i publikimit shkon nga 30 në 45 ditë. Qeraja në këto zona vlerësohet në rreth 500 euro, duke pasur çmimin maksimal deri në 1000 euro. /TvScan.al
