Ambasadori i Mbretërisë së Holandës në Shqipëri, Reinout Vos, zhvilloi një vizitë në Drejtorinë e Përgjithshme të Parandalimit të Pastrimit të Parave, ku u takua me drejtorin e përgjithshëm Ervin Koçi dhe stafin drejtues të institucionit, në kuadër të një shkëmbimi të thelluar mbi mbikëqyrjen financiare, forcimin institucional dhe reformat që lidhen me procesin e integrimit europian.
Sipas njoftimit të publikuar nga Ambasada e Holandës në rrjetet sociale, diskutimet reflektuan përgatitjen serioze të agjencisë dhe angazhimin e saj për të avancuar reformat, duke theksuar qasjen profesionale, gatishmërinë teknike dhe fokusin strategjik në përafrimin me standardet e Bashkimit Europian.
Ambasada e Mbretërisë së Holandës thekson se Drejtoria e Parandalimit të Pastrimit të Parave luan një rol kyç në procesin e integrimit europian të Shqipërisë, ku hetimet financiare efektive, sistemet e forta kundër pastrimit të parave dhe bashkëpunimi institucional konsiderohen shtylla kryesore për përmbushjen e kritereve të anëtarësimit.
Ambasada nënvizon gjithashtu se Mbretëria e Holandës vlerëson dialogun e hapur dhe konstruktiv me institucionet shqiptare dhe mbetet e angazhuar për të thelluar më tej bashkëpunimin, duke kujtuar mbështetjen e vazhdueshme që Holanda ka dhënë ndër vite për forcimin e shtetit të së drejtës dhe luftën kundër pastrimit të parave në Shqipëri. /IliriaNews.al
