nga Skyweb.al
Kryeministri Edi Rama është duke bërë një përpjekje titanike, aq sa nuk ka bërë madje as për zëvendësen e tij, për të mbrojtur publikisht ish-drejtoreshën e AKSHI-t Mirlinda Karçanaj, e cila ndodhet në arrest shtëpie me akuza të rënda si ajo e grupit të strukturuar kriminal që manipuloi tenderët e sektorit të teknologjisë së informacionit duke kanalizuar, sipas SPAK, dhjetëra miliona euro për kompanitë e lidhura direkt apo indirekt me Ergys Agasin dhe Ermal Beqirin.
Për të mbështetur argumentin e pafajësisë së Karçanajt, zonjës që bashkë me Daniel Shimën kanë firmosur të gjithë tenderët korruptivë të AKSHI-t, kryeministri tha se ajo jetonte me qira dhe se nuk kishte makinë. Prandaj, sipas tij, Mirlinda Karçanaj është e pafajshme.
Ç’është ky fiksim i Ramës me Karçanajn?!
Duke qenë se jemi një shoqëri me memorie peshku dhe kur skandali kap skandalin, kryeministri shpreson se do të harrohet çfarë doli në media nga dosja e AKSHI-t dhe vizitat e shpeshta të drejtoreshës pa makinë në zyrën private të Ergys Agasit, të portretizuar nga SPAK si koka e skemës së manipulimit të tenderëve të institucionit që ajo drejton.
Për fatin e mirë të SPAK, Agasi ka filmuar të gjitha takimet e zhvilluara në atë zyrë, përfshi edhe bisedat me Karçanajn dhe Ermal Beqirin kur flasin se “tenderi bën 2 milionë dhe ne do ta bëjmë 4”, apo kur e takon shefen e AKSHI-t me përqafime dhe puthje teksa ajo hyn në zyrë, apo edhe kur i drejtohet me “o ti zemra”.
Ndryshe nga shumë dosje të tjera, për fatin e mirë të Karçanajt dhe mbrojtësve të saj publikë, nga kjo dosje nuk ka pasur rrjedhje informacioni, pasi siç thonë ata që dinë më shumë se shkruesi i këtyre radhëve, nëse do të dilte çfarë ka ndodhur në atë zyrë, do të skandalizohej një Shqipëri e tërë, nëse ka më për t’u skandalizuar.
GJKKO ka dhënë dy herë masën e sigurisë “arrest shtëpie” për Mirlinda Karçanajn.
Herën e parë kur SPAK kërkoi këtë masë sigurie dhe herën e dytë kur Karçanaj kërkoi heqjen e masës së sigurisë dhe Apeli rikonfirmoi masën ndaj saj.
Krahas videove me Agasin, është edhe dëshmia e Daniel Shimës që ka gozhduar ish-drejtoreshën e AKSHI-t, e cila dyshohet se është përgjegjëse për manipulimin e tenderëve, përgatitjen e kushteve teknike të tilla që të fitojnë kompanitë e lidhura me Agasin dhe Beqirin, etj.
Sigurisht, për aq kohë sa çështja është ende nën hetim dhe nuk ka një vendim të formës së prerë, Karçanaj prezumohet e pafajshme, megjithatë nëse Rama ka vendosur të shpërthalloje Reformën në Drejtësi, kauza personale e saj nuk është e duhura për kryeministrin e vendit, ose të paktën nëse do të vijojë ta bëjë, kryeministri të shpjegojë se çfarë kërkon Mirlinda Karçanaj në zyrën e Ergys Agasit. /skyweb.al
