Partia më e madhe në qeverinë e koalicionit në Poloni po përgatit legjislacion që do t’u ndalonte fëmijëve nën moshën 15 vjeç përdorimin e rrjeteve sociale, duke hapur rrugën për një përplasje të mundshme me gjigantët amerikanë të teknologjisë, raporton Reuters.
Ministrja e Arsimit, Barbara Nowacka, deklaroi të premten se qeveria planifikon të gjobisë kompanitë e rrjeteve sociale deri në 6% të xhiros së tyre nëse shërbimet e tyre mbeten të aksesueshme për fëmijët nën 15 vjeç. Sipas saj, platformat do të detyrohen gjithashtu të verifikojnë moshën e përdoruesve.
“Duhet të kufizojmë aksesin në rrjetet sociale për fëmijët nën 15 vjeç. Njëkohësisht duhet të punojmë për shëndetin mendor dhe të rrisim ndërgjegjësimin mes fëmijëve, prindërve dhe gjithë shoqërisë polake për rreziqet e rrjeteve sociale,” tha Nowacka në një konferencë për shtyp.
Në një intervistë për Bloomberg News, ajo shtoi se ligji mund të hyjë në fuqi në fillim të vitit 2027. Megjithatë, mbetet e paqartë nëse pjesa tjetër e koalicionit qeverisës do ta mbështesë nismën.
Kjo iniciativë mund ta vendosë Varshavën në përplasje me kompani amerikane të teknologjisë si Meta dhe platformën X në pronësi të Elon Musk, të cilat më parë kanë kundërshtuar masa të ngjashme kufizuese, veçanërisht pas ndalimit të miratuar në Australi vitin e kaluar.
“Ne nuk po shohim pasaportën e Big Tech. Po shohim sigurinë e fëmijëve polakë,” deklaroi Nowacka për Reuters, duke theksuar se askush nuk ka të drejtë të rrezikojë zhvillimin dhe sigurinë e të rinjve.
Qeveria britanike njoftoi në janar se po shqyrton kufizime të ngjashme për të mbrojtur fëmijët online, pasi Australia zbatoi ligje të tilla në dhjetor. Edhe vende të tjera evropiane, përfshirë Danimarkën, Greqinë, Francën dhe Spanjën, kanë eksploruar masa të ngjashme mes pretendimeve se rrjetet sociale mund të jenë të dëmshme ose varësuese për të miturit. /skyweb.al
