Erjona Ismaili emërohet Ministre për Marrëdhëniet me Parlamentin
Erjona Ismaili ka marrë detyrën e Ministres për Marrëdhëniet me Parlamentin. Ajo është lindur më 26 mars 1990 në Sarandë. Ka studiuar për drejtësi dhe më pas ka përfunduar një master profesional në të Drejtën Administrative si dhe një master shkencor në Shkencat e Komunikimit, Marrëdhënie Publike Politike.
Ismaili ka punuar në media dhe administratën publike dhe është angazhuar në projekte të Bashkimit Evropian. Ajo ka shërbyer si Koordinatore Rajonale në projektin zviceran “Bashki të Forta”. Në zgjedhjet e fundit kandidoi dhe fitoi si deputete në Qarkun Vlorë nën siglën e Partisë Socialiste të Shqipërisë. Përveç funksionit të deputetes, së fundi ka qenë edhe zëdhënëse e grupit parlamentar të PS.
Ferid Hoxha merr drejtimin e Ministrisë për Evropën dhe Punët e Jashtme
Ferid Hoxha është emëruar Ministër për Evropën dhe Punët e Jashtme. Ai është diplomat karriere me mbi tre dekada përvojë dhe ka përfaqësuar Shqipërinë në BE, Francë, Belgjikë dhe në OKB. Hoxha lindi më 22 shkurt në Shkodër dhe u diplomua në vitin 1988 në Fakultetin e Gjuhëve të Huaja për Gjuhë dhe Kulturë Frënge në Universitetin e Tiranës.
Ai është diplomuar gjithashtu në Institutin Holandez të Marrëdhënieve Ndërkombëtare “Clingendael” në Hagë. Karrierën diplomatike e nisi në vitin 1991 në Ministrinë e Jashtme. Në vitin 1998 u emërua ambasador i Jashtëzakonshëm dhe Fuqiplotë pranë Bashkimit Evropian në Bruksel deri në vitin 2001. Më pas shërbeu ambasador në Francë dhe Portugali, sekretar i Përgjithshëm i Ministrisë së Jashtme dhe në vitin 2009 ambasador i Shqipërisë në OKB, njëkohësisht i akredituar edhe për Kubën.
Enea Karakaçi në krye të Ministrisë së Infrastrukturës dhe Energjisë
Enea Karakaçi është emëruar Ministër i Infrastrukturës dhe Energjisë. Ai ka drejtuar OSHEE Group dhe ka mbajtur poste kyçe në hartimin e politikave për energjinë, burimet e rinovueshme dhe eficiencën energjetike. Karakaçi është jurist me master në të Drejtën e BE-së nga Universiteti i Amsterdamit.
Ai ka eksperiencë të gjatë në sektorin energjitik dhe rregullator. Më herët ka qenë Drejtor i Përgjithshëm për Politikat dhe Zhvillimin e Energjisë dhe Industrisë në Ministrinë e Infrastrukturës dhe Energjisë, ku ka qenë përgjegjës për zhvillimin e politikave dhe strategjive për energjinë, energjinë e rinovueshme, naftën, gazin, mineralet dhe eficiencën energjetike. Përvojat e para i ka marrë në Entin Rregullator të Energjisë dhe më pas në Ministrinë e Energjitikës në poste të ndryshme.
Ermal Nufi emërohet Ministër i Mbrojtjes
Ermal Nufi ka marrë detyrën e Ministrit të Mbrojtjes. Ai ka shërbyer si Zëvendës Sekretar i Përgjithshëm i Kryeministrisë dhe ka përvojë të gjerë si jurist, avokat dhe konsulent ligjor.
Nufi ka mbajtur poste drejtuese në institucione si ARRSH, ASHK dhe ASIG, duke kombinuar eksperiencën ligjore me administrimin publik. Ai vjen në këtë detyrë me një profil të gjatë në administratë dhe në sektorin ligjor, ndërsa njihet nga qytetarët edhe si Pastor në një kishë. /skyweb.al
