Bllokimi i aksit Librazhd Prrenjas pas shembjes së një pjese të rrugës ka rikthyer në vëmendje debatet mbi ndikimin e punimeve për Korridorin VIII, ndërsa Kryeministri Edi Rama reagoi publikisht duke theksuar se rrëshqitja e tokës nuk lidhet me projektin.
Në një video të publikuar në rrjetet sociale, kreu i qeverisë e cilësoi ndërtimin e këtij segmenti si një punë kolosale, duke nënvizuar se mbrojtja lumore është pjesë integrale e investimit. Sipas tij, rrëshqitja e tokës në zonën e njohur si Arrat e Gurrës ka ardhur për shkaqe natyrore dhe nuk ka lidhje me punimet për korridorin.
Deklarata vjen në një moment kur një pjesë e ekspertëve shprehen se rrëshqitja mund të jetë ndikuar nga ndërhyrjet në terren gjatë ndërtimit të aksit të ri. Po ashtu, organizata të shoqërisë civile kanë ngritur shqetësime për ndikimin në lumin Shkumbin, duke raportuar ndryshime në morfologjinë e tij, nxjerrje inertesh dhe depozitime materialesh gërmimi pranë ose brenda trupit ujor, të cilat sipas tyre mund të ndikojnë në cilësinë e ujit, biodiversitetin dhe stabilitetin e brigjeve.
Ndërkohë Autoriteti Rrugor Shqiptar njoftoi se puna vijon pa ndërprerje për pastrimin e zonës së rrëshqitur dhe për marrjen e kampioneve gjeologjike. Sipas ARRSH, devijimi i lumit ka përfunduar, ndërsa pritet nisja e punimeve për rrugën alternative sapo të përfundojë rishikimi i projektit në këtë segment.
Institucioni thekson se në terren janë angazhuar mjete dhe personel i shtuar, me synimin për rikthimin e qarkullimit në kohën më të shpejtë të mundshme duke respektuar standardet teknike dhe të sigurisë. /skyweb.al
