Apple pritet të dërgojë më shumë celularë sesa Samsung gjatë vitit 2025, një ngjarje që ndodh për herë të parë pas 14 vitesh.
Sipas parashikimeve, kompania do të shpërndajë rreth 243 milionë iPhone këtë vit, krahasuar me 235 milionë nga Samsung. Kjo do t’i japë Apple një pjesë prej 19.4% të tregut global të telefonëve, ndërsa Samsung pritet të ketë 18.7%. Vlera e dërgesave i referohet pajisjeve që kompania dërgon tek kanalet e shitjes dhe nuk përkthehet direkt në shitje, por është një tregues i qartë i kërkesës dhe pritshmërive për shitjet e ardhshme.
Rritja e Apple mbështetet kryesisht te iPhone 17, i prezantuar në shtator, i cili ka shënuar një rritje të kërkesës gjatë sezonit të fundit. Në SHBA, shitjet e iPhone 17, duke përfshirë iPhone Air, gjatë katër javëve të para pas lansimit ishin 12% më të larta se ato të iPhone 16. Në Kinë, një treg kyç për Apple, shitjet e këtij modeli ishin 18% më të larta se të paraardhësit të tij.
Një faktor tjetër i rëndësishëm është që shumë konsumatorë që kishin blerë celularë gjatë periudhës së Covid-19 tani po i zëvendësojnë pajisjet e vjetra me modelet më të reja.
Ndërkohë, Samsung mund të përballet me sfida në treg, për shkak të konkurrencës në rritje nga prodhuesit kinezë, që mund të pengojnë kompaninë koreanase të rikthehet në vendin e parë të shitjeve globale. /Skyweb.al
