Qeveria ka vendosur të krijojë një regjistër elektronik kombëtar për të gjithë personat që ndalohen të hyjnë në ambiente fizike apo platforma online të lojërave të fatit, një mekanizëm i ri që synon të kufizojë varësinë dhe pasojat financiare e sociale që ajo shkakton.
Vendimi i miratuar nga Këshilli i Ministrave parashikon që regjistri të administrohet nga Autoriteti i Mbikëqyrjes së Lojërave të Fatit, i cili do të mbajë të gjitha të dhënat për personat e ndaluar. Operatorët e licencuar, si kazino apo platforma online, do të kenë akses vetëm për ta konsultuar listën, me qëllim verifikimin nëse një person lejohet apo jo të luajë.
Sipas vendimit, kërkesa për t’u përfshirë në këtë listë mund të bëhet në portalin e-Albania nga vetë lojtari ose nga familjarët e tij, si bashkëshorti, prindërit apo fëmijët madhorë.
Në rast se aplikimi bëhet nga vetë personi, Autoriteti merr vendim brenda dy ditëve dhe ndalimi regjistrohet menjëherë. Kur kërkesa paraqitet nga familjarët, afati i shqyrtimit është deri në pesë ditë dhe duhet të shoqërohet me dokumente që provojnë problemet e lidhura me varësinë nga lojërat e fatit.
Vendimi përcakton gjithashtu se regjistri do të përmbajë të dhëna identifikuese, periudhën e ndalimit dhe llojin e lojërave për të cilat zbatohet masa.
Pas përfundimit të afatit, të dhënat fshihen automatikisht, ndërsa personi ka të drejtë të kërkojë anulimin e ndalimit jo më herët se tre muaj nga vendimi fillestar, nëse provohet ndryshimi i rrethanave.
Qëllimi kryesor i këtij mekanizmi është parandalimi dhe minimizimi i pasojave socio ekonomike të varësisë nga lojërat e fatit, që sipas qeverisë përbën një rrezik serioz për stabilitetin financiar dhe familjar të individëve të prekur.
Regjistri do të funksionojë në përputhje me legjislacionin për mbrojtjen e të dhënave personale dhe vendimi hyn në fuqi pas botimit në Fletoren Zyrtare. /skyweb.al
