Ngushtica e Hormuzit është mbyllur zyrtarisht nga forcat iraniane, një zhvillim që rrezikon të prodhojë tronditje të menjëhershme në tregjet ndërkombëtare të energjisë dhe në ekuilibrat gjeopolitikë.
Korridori detar që lidh Gjirin Persik me pjesën tjetër të botës është ndër arteriet më jetike për furnizimin global me naftë dhe gaz, ndaj ndërprerja e qarkullimit aty shihet si një nga skenarët më të ndjeshëm për ekonominë botërore.
Sipas vlerësimeve të institucioneve ndërkombëtare të energjisë, përmes kësaj rruge kalon afërsisht një e pesta e naftës që konsumohet çdo ditë në planet, me volume që arrijnë rreth 20 milionë fuçi në ditë.
Po ashtu, një pjesë e konsiderueshme e tregtisë globale të gazit natyror të lëngshëm, kryesisht nga Katari, përdor të njëjtin kalim, ndërsa pjesa dërrmuese e këtyre furnizimeve ka si destinacion tregjet aziatike.
Bllokada pritet të ketë efekt të menjëhershëm në çmimet e energjisë dhe në zinxhirët e furnizimit, me ndikim të drejtpërdrejtë te ekonomitë e mëdha importuese.
Kina, vendet evropiane dhe Shtetet e Bashkuara konsiderohen ndër më të ekspozuarat ndaj një ndërprerjeje të zgjatur, për shkak të varësisë nga furnizimet që kalojnë në këtë korridor.
Megjithatë, ekspertët paralajmërojnë se pasoja të rënda mund të ketë edhe për vetë Iranin, pasi kufizimi i trafikut në Hormuz rrezikon të reduktojë ndjeshëm të ardhurat nga eksportet energjetike, një nga burimet kryesore të financimit të ekonomisë së vendit.
Kërcënimi për mbylljen e ngushticës ka qenë i përsëritur prej dekadash, duke u përdorur si mjet presioni në momente tensionesh të larta ndërkombëtare.
Përpjekjet e vendeve të rajonit për të ndërtuar korridore alternative përmes tubacioneve tokësore kanë reduktuar pjesërisht rrezikun, por kapacitetet e tyre mbeten shumë më të ulëta se fluksi që zakonisht kalon përmes Hormuzit, duke e bërë këtë rrugë ende nyjen më kritike të furnizimit global me energji. /skyweb.al
