Presidenti i SHBA-së, Donald Trump, ka vendosur një valë të re tarifash tregtare ndaj më shumë se 90 vendeve anembanë globit, në kuadër të politikës së tij për të riformësuar sistemin tregtar global, që ai e konsideron të padrejtë ndaj Shteteve të Bashkuara.
“Miliarda dollarë në formë tarifash po rrjedhin tani në Shtetet e Bashkuara të Amerikës!”, deklaroi Trump përmes një postimi në rrjetet sociale.
Në mesin e masave më të ashpra është vendosur një tarifë prej 50% ndaj Indisë, që pritet të hyjë në fuqi më 27 gusht, në rast se New Delhi nuk ndalon blerjet e naftës ruse.
Administrata amerikane ka publikuar javën e kaluar një listë të re me taksat ndaj importeve nga dhjetëra partnerë tregtarë dhe ka zgjatur afatin e negociatave për marrëveshje të reja deri më 7 gusht. Vendet e Azisë Juglindore si Laosi dhe Mianmari, që mbështeten fuqishëm në eksportet, janë ndër më të prekurat, me tarifa që arrijnë deri në 40%.
Ndërkohë, disa vende të mëdha si Japonia, Koreja e Jugut dhe Mbretëria e Bashkuar kanë arritur marrëveshje për tarifa më të ulëta, pas kërcënimeve fillestare të administratës amerikane në muajin prill.
Bashkimi Evropian ka nënshkruar një marrëveshje kornizë me SHBA-në, përmes së cilës është rënë dakord për një tarifë 15% ndaj mallrave evropiane. Tajvani është penalizuar me një tarifë 20%, por autoritetet tajvaneze e konsiderojnë këtë masë si të përkohshme, ndërsa negociatat me Uashingtonin vazhdojnë.
Një tjetër masë e diskutueshme është rritja e tarifës ndaj Kanadasë, nga 25% në 35%, për shkak të mospërmbushjes së kërkesave amerikane për të ndalur trafikun e fentanilit dhe drogave të tjera përtej kufirit. Megjithatë, shumica e eksporteve kanadeze do të shmangin këto masa falë Marrëveshjes SHBA-Meksikë-Kanada (USMCA).
Tarifat ndaj Meksikës janë pezulluar për 90 ditë, teksa negociatat për një marrëveshje të re vazhdojnë. Ndërkohë, ekspertët ndërkombëtarë paralajmërojnë se objektivi i fshehur i këtyre tarifave mund të jenë vendet me lidhje të ngushta tregtare me Kinën./skyweb.al
