Kompania nga Kosova Viva Fresh ka finalizuar javën e kaluar blerjen e zinxhirit të dytë më të madh të supermarketeve në Shqipëri, Spar Albania, duke hyrë zyrtarisht në tregun vendas të shitjeve me pakicë.
Transaksioni u mbyll me një vlerë prej 36.4 milionë eurosh, shumë që iu pagua grupit BALFIN në këmbim të kuotës së plotë të aksioneve të Spar Albania. Blerja u mbështet financiarisht kryesisht nga Banka Europiane për Rindërtim dhe Zhvillim (BERZH), e cila i akordoi Viva Fresh një kredi prej 25 milionë eurosh për të mbështetur hyrjen e saj në tregun shqiptar.
Viva Fresh, në pronësi të biznesmenit Xhevdet Rexhepi, është lideri i tregtisë me pakicë në Kosovë dhe ka zgjeruar aktivitetin e saj edhe në Maqedoninë e Veriut përmes rrjeteve Viva Fresh Store dhe Super Kit Go.
Spar Albania operon me 92 markete dhe katër hipermarkete në gjithë Shqipërinë. Si franchise, ky rrjet pozicionohet i dyti në vend pas Big Market, duke përfshirë edhe pikat që operojnë nën markën Spar, por që menaxhohen nga palë të tjera.
Spar Albania realizoi një xhiro prej 12 miliardë lekësh gjatë vitit të kaluar, me një rritje prej 15% në krahasim me vitin paraardhës. Megjithatë, fitimi para tatimit ra lehtë në 402 milionë lekë, me një ulje prej 1%.
Për grupin BALFIN, në pronësi të Samir Manes, kjo është një tjetër dalje e rëndësishme nga tregu i retail.
Kujtojmë se në vitin 2007, Mane shiti rrjetin e tij Euromax kompanisë serbe Delta Maxi Group për 29 milionë euro.
Ky rrjet kaloi më pas në pronësi të kompanisë belge Delhaize Group dhe më vonë te një partneritet greko-francez, nën markën Carrefour.
Në vitin 2015, Carrefour u tërhoq nga Shqipëria dhe rrjeti iu rikthye sërish grupit BALFIN.
Në vitin 2016, Balfin firmosi marrëveshjen me grupin holandez Spar, duke marrë ekskluzivitetin për përdorimin e markës dhe produkteve të tij në Shqipëri.
Me këtë lëvizje, panorama e tregtisë me pakicë në Shqipëri përjeton një tjetër ndryshim të rëndësishëm, duke thelluar prirjen e hyrjes së kapitalit nga rajoni në sektorët strategjikë të konsumit. /skyweb.al
