Lëvizje të reja janë bërë më 31 gusht në strukturat drejtuese të Policisë së Shtetit, vetëm pak ditë pas hyrjes në fuqi të ligjit të ri.
Luigj Vathi është emëruar drejtor i Kufirit dhe Migracionit në Korçë, pasi më herët drejtonte Policinë Vendore të Beratit.
Në vend të Gëzim Zhupajt, i cili transferohet si shef sektori në Drejtorinë e Përgjithshme, drejtimin në Korçë do ta marrë Vathi.
Ndërkohë, Kastriot Skënderaj pritet të emërohet drejtor i Policisë së Elbasanit, duke zëvendësuar Fatmir Hoxhën.
Por lëvizja që ka shkaktuar më shumë reagime lidhet me Gjovalin Lokën, i cili është emëruar për të drejtuar Policinë e Beratit.
Sipas infonews.al, Loka ka kundërshtuar urdhrin dhe ka refuzuar të marrë detyrën e re, duke deklaruar se nuk do të shkojë në Berat.
Ende nuk dihen arsyet e këtij qëndrimi dhe as emri që do të propozohet për drejtimin e Policisë së Beratit.
Ndryshimet vijnë pasi ligji i ri i jep drejtorit të Përgjithshëm të Policisë të drejtën të emërojë drejtorë dhe shefa komisariatesh pa garë, kur vlerëson se nevojiten impulse të reja për rendin dhe sigurinë publike.
